Kosovarët dhe Malazezët vendosin për pamjen e euros, ja detajet e ndryshimit të madh

Banka Qendrore Evropiane, ECB, përzgjodhi 10 propozime dizajni për kartëmonedhat e ardhshme euro, bazuar në temat e ‘kulturës evropiane’ dhe ‘lumenjve dhe zogjve’.

Është ky rezultat i një konkursi në të gjithë BE-në që rezultoi me më shumë se 1.200 pjesëmarrje me dizajne të ndryshme, nga të cilat u zgjodhën 25 dizajnerë për të krijuar atë përfundimtar. Një juri e pavarur prej 21 ekspertësh në dizajn grafik, komunikim, histori dhe shkenca të tjera shoqërore zgjodhi më pas 10 propozime.

Si do ta ketë pamjen euro do të vendoset së pari nga qytetarët në një anketë. Meqenëse zona e euros, ose zona në të cilën euro është monedha zyrtare, mbulon 21 nga 27 anëtarët e Bashkimit Evropian, është logjike të supozohet se ata do të vendosin se si do të duket monedha e tyre. Por kjo nuk është tamam kështu.

E hapur për të gjithë

Përkatësisht, do të votojnë edhe qytetarët e Kosovës dhe Malit të Zi, dy vende që nuk janë në eurozonë, por që kanë vendosur në mënyrë të pavarur të prezantojnë euron si monedhën e tyre zyrtare. Përveç tyre, mund të votojnë edhe qytetarët e Andorrës, Monakos, Vatikanit dhe San Marinos, vende që herë pas here lëshojnë seri monedhash shumë të vlefshme dhe përdorin euron si monedhën e tyre zyrtare bazuar në marrëveshje të veçanta me BE-në.

“Anketa online është e hapur për të gjithë njerëzit në Evropë. Kjo do të thotë që qytetarët e vendeve evropiane që nuk janë anëtare të eurozonës mund të marrin pjesë gjithashtu në të,” është shprehur Banka Kombëtare e Kroacisë, HNB, për median kroate “tportal”.

Vendimi mbetet ende në dorë të ECB-së

Ata theksojnë se ECB-ja po kryen një anketë të veçantë mbi një kampion përfaqësues të qytetarëve të vendeve që janë ekskluzivisht në zonën e euros, dhe votat e mbledhura do të jenë një bazë e mirë për vendimin përfundimtar mbi kartëmonedhat e reja euro.

“Vendimi përfundimtar mbi dizajnin e kartëmonedhave të reja nuk do të merret nga vetë anketa publike, por nga Këshilli Drejtues i Bankës Qendrore Evropiane bazuar në disa elementë, duke përfshirë rezultatet e të dy anketave dhe një vlerësim nga ekspertë dhe teknik të propozimit të dizajnit,” shpjegon HNB.

Dizajnet e propozuara për kartëmonedhat e ardhshme euro mund t’i shikoni  KËTU, dhe, mund të votoni  KËTU.