Kosovë, hyn në fuqi kufizimi i ri i pagesave: mbi 2000 euro vetëm përmes bankës

Nga sot ka hyrë në fuqi vendimi i Administratës Tatimore të Kosovës, ATK, sipas të cilit pagesat ndërmjet bizneseve dhe individëve në vlerë mbi 2.000 euro nuk mund të realizohen më me para të gatshme.

Sipas ATK-së, të gjitha transaksionet që e tejkalojnë këtë shumë duhet të kryhen vetëm përmes sistemit bankar ose përmes formave të tjera të pagesave elektronike.

Ky kufizim, i cili zbatohet nga 1 qershori 2026, është në përputhje me legjislacionin në fuqi dhe ka për qëllim formalizimin e ekonomisë, rritjen e transparencës financiare dhe uljen e përdorimit të parasë së gatshme në transaksione të mëdha.

Në njoftimet e saj, ATK ka theksuar se edhe në rastet kur pagesa ndahet në disa këste, vlera totale e transaksionit konsiderohet në zbatimin e kufizimit ligjor.

“Pagesat mbi 2.000€ nuk bëhen më me para të gatshme. Nga 1 qershori 2026, nëse një biznes shet mallra ose ofron shërbime për individë, pagesa mbi këtë vlerë duhet të bëhet përmes bankës ose formave elektronike. Edhe nëse pagesa ndahet në disa pjesë, limiti vlen për vlerën totale të transaksionit. Mos pranoni para në dorë mbi 2.000€. Veproni sipas ligjit dhe shmangni gjobat”, thuhet në njoftimin e ATK-së.

Autoritetet u kanë bërë thirrje qytetarëve dhe bizneseve që të respektojnë kufizimin ligjor, në mënyrë që të shmangen gjobat dhe ndëshkimet e mundshme.