Kosovë, nga ora 11:00-17:30, kufizohet qarkullimi në autostradë i kamionëve mbi 20 tonë

Ministria e Infrastrukturës dhe Transportit e Kosovës ka njoftuar se sot do të ketë kufizime të përkohshme të qarkullimit në autostradë për automjetet e transportit të mallrave mbi 20 tonë.

Kufizimi, sipas Ministrisë Infrastrukturës, do të zbatohet nga ora 11:00 deri në orën 17:30, pasi temperaturat e parashikuara arrijnë 32 °C ose më shumë.

Në rrugët nacionale, rajonale dhe lidhëse nuk do të ketë kufizime, pasi nuk janë plotësuar kushtet e përcaktuara me vendim.

Ministria e Infrastrukturës dhe Transportit e Kosovës ka bërë të ditur se do të vazhdojë monitorimin e përditshëm të temperaturave dhe do të njoftojë qytetarët dhe operatorët ekonomikë për çdo ndryshim lidhur me zbatimin e vendimit.