Kosovë, përkujtohen dëshmorët e kombit, vlerësohet sakrifica për liri!
Në kuadër të shënimit të 5 Majit, Ditës së Dëshmorëve të Kombit, në Shtime është mbajtur një akademi përkujtimore kushtuar të rënëve për liri, e organizuar nga Komuna e Shtimes në bashkëpunim me Shoqatën e Familjeve të Dëshmorëve.
Me këtë rast, ministri i Punës, Familjes dhe Vlerave të Luftës së UÇK-së, Andin Hoti, tha se historia shqiptare është e ndërtuar mbi sakrificë të vazhdueshme dhe figura të shumta që kanë kontribuar në lirinë e vendit.
“Tek një popull kaq i vogël gjenden emra e vepra që vështirë i gjen edhe tek popujt më të mëdhenj të historisë botërore. Nëse e përmendim mbretin Agron, pashmangshëm na vjen ndër mend edhe mbretëresha Teutë. Kur e përmendim Azem Galicën, në mendjen tonë na shfaqet Shote Galica, gruaja e patriotit të Drenicës. Si kurorë mbi të gjitha historitë e sakrificës qëndron historia e Zahide dhe Shaban Jasharit,” tha Andin Hoti ndërsa përmendi edhe familjen Jashari, të cilën ai e cilësoi si kulmin e sakrificës kombëtare dhe simbol të rezistencës së UshtriSë Çlirimtare të Kosovës.
“UÇK-ja, ideali për liri, shembulli i sakrificës dhe frymëzimit për rezistencë, gjithçka që përfaqëson virtytet që sollën lirinë tonë, na sjell në mendje familjen Jashari. Shaban, Murat Jashari dhe Zahide Jashari ranë dëshmorë më 5, 6 dhe 7 mars, në mesin e 59 dëshmorëve që ranë atë ditë. Bashkë me ta ra edhe Zarife Jashari, bashkëshortja e Rifatit, i cili kishte qenë pjesë e rezistencës me armë,” tha ministri Hoti duke renditur dhe figura dhe ngjarje të tjera të luftës së fundit, përfshirë Fehmi dhe Xhevë Lladrovcin, Mujë Krasniqin, Luljeta Shalën dhe dëshmorë të tjerë që ranë për liri.
Këto histori, tha ministri i Punës, Familjes dhe Vlerave të Luftës së UÇK-së, Andin Hoti, nuk janë vetëm kujtesë e së kaluarës, por themel i përgjegjësisë për të ardhmen, brezat e sotëm kanë detyrë të ruajnë dhe të zhvillojnë vlerat e lirisë dhe sakrificës.
Edhe kryetari i Komunës së Shtime, Qemajl Aliu, e ka vlerësuar lart sakrificën e shqiptarëve për liri dhe rolin e grave dhe burrave në historinë kombëtare ndërsa theksoi se historia shqiptare është e ndërtuar mbi sakrificë dhe rezistencë të vazhdueshme.
“Nuk ka krenari më të madhe se të jesh shqiptar dhe pjesëtar i një kombi me histori kaq lavdishme. E kaluara jonë është unike, sepse është ndërtuar nga gratë dhe burrat më të denjë të kësaj toke.”
Qemajl Aliu vuri theks të veçantë në rolin e gruas shqiptare në historinë e rezistencës, duke përmendur figura si Shote Galica dhe heroinat e luftës së fundit në Kosovë, të cilat i cilësoi si shtyllë të qëndresës kombëtare.
“Te familja Jashari kuptimësohet dhe përmblidhet e gjithë ajo që ka ndodhur historikisht në kullat dhe vatrat tona, ku rezistenca nuk ishte e ndarë në role dhe përgjegjësi, por ishte vendosmëri e përbashkët, e vetëdijshme dhe e pakthyeshme,” u shpreh Qemajl Aliu ndërsa kujtoi edhe Masakrën e Reçakut, duke theksuar se ajo mbetet një nga ngjarjet më të rënda të luftës në Kosova, ku u vranë civilë të pafajshëm, përfshirë gra dhe fëmijë.
Këto ngjarje, tha Kryetari i Komunës së Shtime, Qemajl Aliu, nuk janë vetëm kujtime të së kaluarës, por themel i përgjegjësisë së sotme për ndërtimin e shtetit dhe ruajtjen e dinjitetit dhe lirisë.
