Kosovë, kolona me makina deri në 600 metra te Dheu i Bardhë, pritje më të gjata në Muçibabë

Qendra Kombëtare për Menaxhim Kufitar të Kosovës ka publikuar të dhënat më të fundit mbi gjendjen e fluksit në pikat e kalimit kufitar, ku disa pika raportojnë rritje të pritjeve dhe krijim të kolonave për automjete.

Sipas të dhënave të përditësuara në orën 12:19, pritja më e gjatë për automjete regjistrohet në pikën kufitare Dheu i Bardhë, ku koha e pritjes për hyrje arrin deri në 60 minuta, ndërsa kolona në këtë drejtim është rreth 600 metra.

Në pikën kufitare Muçibabë, hyrja e automjeteve shënon pritje deri në 60 minuta, me kolonë 500 metra. Ndërkohë, në Bërnjak pritja për hyrje varion nga 40 deri në 45 minuta, me kolonë 300 metra.

Në Hanin e Elezit, për hyrje dhe dalje të automjeteve raportohet pritje prej 10 deri në 20 minuta, ndërsa kolonat arrijnë deri në 200 metra në të dy drejtimet. Në Kullë pritjet janë 5 deri në 10 minuta, ndërsa kolonat shkojnë deri në 150 metra

Pikat e tjera kufitare paraqiten me fluks më të qetë, me pritje kryesisht nga 3 deri në 5 minuta dhe pa kolona të konsiderueshme.

Sa i përket qarkullimit të kamionëve, situata paraqitet stabile në të gjitha pikat e kalimit kufitar, me pritje prej rreth 3 deri në 5 minuta dhe pa krijim kolonash.

Autoritetet u bëjnë thirrje udhëtarëve që të informohen për gjendjen në kufi para nisjes dhe, kur është e mundur, të përdorin pika alternative për të shmangur pritjet