Kosovë, sot mbahet tryeza e krerëve të partive politike

Me ftesë të kryetarit të Partisë Demokratike të Kosovës, Kadri Veseli, sot mbahet tryeza e krerëve të partive politike, që ka për qëllim arritjen e konsensusit politik për agjendën shtetërore të Republikës së Kosovës.

Në këtë tryezë, e cila fillon në orën 13:00, Veseli ka propozuar të diskutohet për çështjet më prioritare për shtetin, me theks të veçantë:

-Fazën përfundimtare të dialogut për normalizimin e marrëdhënieve Kosovë-Serbi;

-Hartimin e statutit për asociacionin e komunave me shumicë serbe;

-Agjendën e integrimeve evropiane;

-Formimin e Ushtrisë së Kosovës;

-Reformën zgjedhore.

Ditë me parë, kryetari i Partisë Demokratike të Kosovës, Kadri Veseli ka prezantuar edhe propozim-platformën për konsensus rreth këtyre temave.