KPK shkarkon prokurorin Ndriçim Troplini

Komisioni i Pavarur i Kualifikimit, KPK, sot shkarkoi nga detyra Prokurorin e Durrësit, Ndriçim Troplini.

Gjatë seancës dëgjimore më 6 korrik, KPK ngriti dyshime se dy apartamente të blera në Durrës nga prindërit e prokurorit Ndriçim Troplini mund të jenë pronë e tij, si dhe u konstatuan bilanci negativ e u ngritën dyshime për veprime fiktive në transaksionet për shitjen e një mjeti, gjetje që u kundërshtuan nga Troplini.

Ndriçim Troplini përfundoi studimet në Shkollën e Magjistraturës në vitin 2004 dhe u emërua prokuror në Prokurorinë e Rrethit Gjyqësor Fier. Prej vitit 2008 dhe deri në shkarkimin nga detyra, ai ishte Prokuror në Durrës.

Ndryshe, trupa e Komisionit Pavarur të Kualifikimit që mori Vendimin u kryesua nga Firdes Shuli, me relatore Valbona Sanxhaktarin dhe anëtar Olsi Komicin.