Krahason Bregoviçin me Dua Lipën/ Nëse nuk është i palexuar, Edi Rama është serbofil!

Nuk e dinte Enveri se çfarë bënte Mehmeti! Nuk e din a thua dhe Kryeministri Edi Rama se kush është vërtetë Goran Bregoviç dhe e thërret në Korçë?!

Avokatia që i bëri sonte Kryeministri Edi Rama këtij muzikanti të famshëm serb që është nga Sarajeva dhe adhuron autorin e masakrave serbe në Bosnje Hercegovinë, Radovan Karaxhiç, tregon arsyen e vërtetë pse ai ishte i ftuar në Korçë.

Edi Rama përmes një reagimi në rrjetin social Facebook thotë se ai është muzikant i famshëm nga Sarajeva, me baba kroat, nënë serbe dhe grua muslimane boshnjake, nuk ka qenë gjëkundi mbështetës i regjimit të Milosheviçit as me fjalë as me vepra.

Meqë lexuesi i PaFrikë.al nuk është kaq injorant ne nuk duam ta lodhim me historitë e Bregoviçit, e ata që nuk e kanë lexuar deri më sot kanë rast të dinë kush ishte Goran Bregoviç duke lexuar Bregoviçët, por nuk është e qartë pse Rama implikon politikën shqiptare. Pse duhet politika ti thotë popullit shqiptar se Bregoviçi adhuron Radovan Karaxhiçin kur ai vetë e ka thënë, pse duhet politika ti thotë popullit shqiptar se Bregoviçi ka mbështetë regjimin e Millosheviçit kur ai ka mbajtë koncert në Athinë kundër bombardimit të manikerisë ushtarake të këtij krimineli nga NATO, dhe pse politika duhet ti thotë shqiptarëve se me çfarë kënge janë masakruar shqiptarët e Kosovës, kur ata vetë ishin atje!

Edi Rama harron por ishte pikërisht lufta e Kosovës që i bashkoi shqiptarët dhe bëri në fund që për komunikimin e tyre në mes vete të mos kenë nevojë pë politikanë, as për Enver Hoxhën e Mehmet Shehun, e aq më pak për Edi Ramën!

Kjo avokati e Edi Ramës nuk kuptohet as për faktin se pse për 100-200 serbofil duhet përçarë kombin duke sjellë Goran Bregoviçin në Korçë, dhe të shpenzohet gjithë kjo energji me patronazhistë për të sulmuar Vetëvendosjen dhe Albin Kurtin, kur lëvizja e lirë u mundëson të lëvizin edhe në Serbi, ku mund ta dëgjojnë këtë muzikant të famshëm, facilitet që do ti mundësoj vëllai i Ramës dhe Presidenti serb, Aleksandar Vuçiç.

Në fund, kur Edi Rama duke lartësuar Goran Bregoviçin e krahason me Dua Lipën gjithçka ndryshon realitetin, edhe avokatia e Kryeministrit të Shqipërisë

“Ku ndryshojnë për shembull ata që në Serbi i hakërrehen me fjalorin më të ndyrë Dua Lipës në rrjetet e saj sociale, vetëm pse ajo është një shqiptare krenare e Kosovës, e cila del mbështjellë me të dy flamujt e shteteve tona, me ata që iu hakërryen me shqipen më të ulët në rrjetet tona sociale Goran Bregoviçit, duke e trajtuar si një kriminel lufte e duke i mveshur faje që ai nuk i ka bërë vetëm se ai këndon serbisht? Ndryshojnë vetëm në faktin se të parët shajnë e mallkojnë serbisht, ndërsa të dytët sharjet e mallkimet i lëshojnë në shqip. Të dyja palët i përkasin besnikërisht kategorisë së ulët njerëzore të urrejtësve të verbër, të cilës kjo botë i ka parë vetëm sherrin, kudo e kurdo që ajo ka arritur të imponojë mbi shoqërinë verbërinë e vet,” thotë Edi Rama në avokatinë që i shtron Goran Bregoviçit duke injoruar faktin se jo vetëm Bregoviçi dhe Dua Lipa që ndryshojnë shumë por edhe palët për të cilat flet Rama. Si Dua Lipa ashtu dhe mbështetësit e saj nuk i takojnë një populli që ka bërë krime dhe gjenocid, nuk mbështesin kriminelët e luftës dhe nuk i hakërrehen askujt vetëm pse këndon serbisht! Gjë që ndryshon në rastin e serbëve dhe vetë Bregoviçit!

Kështu, pas avokatisë që i bëri Goran Bregoviçit dhe mori autorsinë e mbështetjes së tij nga rilindja, mediat kombëtare dhe qindëra portaleve pse Bregoviç duhet të vinte në Korçë, në rastin më të mirë mund të thuhet se Edi Rama është i palexuar dhe nuk njeh historinë e tij. Ndryshe, ai është ashtu siç e kanë akuzuar ish-miqtë dhe rivalët e tij, SERBOFIL!

Statusi i plotë i Edi Ramës:

ZJARRI KINSE PATRIOTIK I GUSHTIT

Një gazetare e mirënjohur shqiptare e Kosovës, e cila respektohet ndërkombëtarisht dhe kontribuon për tribuna prestigjoze të shtypit botëror, e tha shumë troç se Goran Bregoviçi nuk ka asnjë lidhje, me asnjë prej të zezave që iu faturuan nga zjarrnxitës mendjefikur, sa në Prishtinë dhe sa në Tiranë.

Por muzikanti i famshëm nga Sarajeva, me baba kroat, nënë serbe dhe grua muslimane boshnjake, u kthye në një “kriminel serb” që duhej djegur në zjarret e gushtit shqiptar, pavarësisht se as serb nuk është përveç të tjerash. Paçka se Bregoviçi nuk ka thënë asgjë kundër shqiptarëve, nuk i ka kënduar asfare masakrave të regjimit të Millosheviçit dhe nuk ka qenë gjëkundi mbështetës i atij regjimi as me fjalë as me vepra, e vërteta as që kishte rëndësi. Rëndësi kishte zjarri i politikës qorre, e cila krijon armiq, ushqehet armiqësisht dhe jeton për armiqësinë – thënë aq bukur nga një prej zjarrnxitësve mendjefikur, “Më pëlqen ta dëgjoj Bregoviçin, po nuk shoh dot me sy Edi Ramën!”.

Askush, hiç askund, nuk e dha asnjë provë të vetme për ta justifikuar histerinë mesjetare që shpërtheu kundër një muzikanti nga më të jashtëzakonshmit e Ballkanit. Ishte një histeri fashiste, e turpshme per qytetarinë europiane të shqiptarëve, për historinë dhe për traditën tonë po ashtu, e cila fatkeqësisht nuk dallonte aspak nga histeritë linçuese të grupeve fashiste kudo në botë.

Ku ndryshojnë për shembull ata që në Serbi i hakërrehen me fjalorin më të ndyrë Dua Lipës në rrjetet e saj sociale, vetëm pse ajo është një shqiptare krenare e Kosovës, e cila del mbështjellë me të dy flamujt e shteteve tona, me ata që iu hakërryen me shqipen më të ulët në rrjetet tona sociale Goran Bregoviçit, duke e trajtuar si një kriminel lufte e duke i mveshur faje që ai nuk i ka bërë vetëm se ai këndon serbisht?

Ndryshojnë vetëm në faktin se të parët shajnë e mallkojnë serbisht, ndërsa të dytët sharjet e mallkimet i lëshojnë në shqip. Të dyja palët i përkasin besnikërisht kategorisë së ulët njerëzore të urrejtësve të verbër, të cilës kjo botë i ka parë vetëm sherrin, kudo e kurdo që ajo ka arritur të imponojë mbi shoqërinë verbërinë e vet.