Krichbaum: Raportet Kosovë-Serbi duhet të normalizohen plotësisht  para anëtarësimit në BE

Raportet në mes Kosovës dhe Serbisë duhet të normalizohen plotësisht  para anëtarësimit në Bashkimin Evropian. Kështu u shpreh pas përfundimit të Samiti të Sofjes, kryetari i Komisionit për Çështje Evropiane pranë Bundestagut, Gunther Krichbaum për të përditshmen serbe “Politika” duke e bërë të qartë rrugën drejtë anëtarësimit për të dy vendet.

Duke kujtuar Krichbaumin se në prag të Samitit të Sofjes kur kishte vizituar Beogradin ishte shprehur se Bashkimit Evropian nuk i duhet edhe një Qipro, duke menduar në zgjidhjen e problemit të Kosovës, ai u pyet se cila do të ishte zgjidhja për të cilën do të ishte dakord Berlini, njeriu më i besuar i kancelares Merkel shprehet:

“Qëllimi është përcaktuar qartë në Kornizën negociuese me Bashkimin Evropian: marrëdhëniet në mes të Serbisë dhe Kosovës duhet të normalizohen plotësisht para anëtarësimit në BE. Vetëm në këtë mënyrë të dy vendet mund të realizojnë perspektivën e tyre evropiane. Shikuar historikisht, Bashkimi Evropian para së gjithash është projekt i paqes. Për këtë arsye nuk dëshirojmë dhe nuk do të importojmë konflikte dypalëshe të pazgjidhura.

Ndryshe, sa i përket Serbisë, përveç normalizimit të marrëdhënieve me Kosovën, kryetari i Komisionit për Çështje Evropiane në Bundestagun gjerman, Gunther Krichbaum tha se Serbia ka edhe shumë për të bërë për pavarësinë e gjyqësorit, lirisë së mediave dhe luftës kundër krimit të organizuar dhe korrupsionit.