Kryeministri Albin Kurti e përfaqëson Kosovën në Këshillin e Sigurimit të OKB-së

Kryeministri i Kosovës, Albin Kurti, do ta përfaqësojë Kosovën në Këshillin e Sigurimit të Kombeve të Bashkuara.

Kryeministri Albin Kurti dhe Zv/Kryeministrja Donika Gërvalla Schwarz, kanë udhëtuar për në Shtetet e Bashkuara ku do të marrin pjesë në mbledhjen e Këshillit të Sigurimit të OKB-së, bënë të ditur Qeveria e Kosovës.

“Kryeministri i Republikës së Kosovës, Albin Kurti dhe zëvendëskryeministrja dhe ministrja e Punëve të Jashtme dhe Diasporës, Donika Gërvalla-Schwarz, kanë udhëtuar mbrëmë për në Shtetet e Bashkuara të Amerikës. Kryeministri Kurti pritet të marrë pjesë në seancën e Këshillit të Sigurimit të Kombeve të Bashkuara, që do të mbahet sonte në orën 21:00, sipas orës lokale të Kosovës,” thuhet në njoftim e Qeverisë së Kosovës.

Në po këtë mbledhje, Serbia do të përfaqësohet nga Presidenti serb, Aleksandar Vuçiç.

Ndryshe, sot në New York do të mbahet seanca e jashtëzakonshme e Këshillit të Sigurimit të Kombeve të Bashkuara për situatën në Kosovë, e paraparë me kërkesë të Serbisë. Seanca pritet të fillojë nga ora 21:00.