Kryetari i ri pa Kunat, Oligarkë…
nga Agim Popoci
Lulzim Basha sërish u votua nga anëtarësia e Partisë Demokratike për ti udhëhequr drejt rrëzimit të regjimit të Edi Ramës.
Sot, kjo fitore e Lulzim Bashës nuk u shoqërua me ndonjë entuziazëm të veçantë madje u pa me skpeticizëm nga shumë demokratë, gjë që u reflektua edhe në pjesëmarrjen e ulët për zgjedhjen e Kryetarit të PD! Ndërkohë edhe ata servilë që vazhdojnë dhe i rrahin krahët Kryetarit, e dinë se fitorja e Lulzim Bashës është korrur me 20 mijë demokratë më pak se sa në vitin 2017, kur me arsye mburreshin; Mburreshin sepse Lulzim Basha u rizgjodhë me mbi 20.000 vota më shumë se në vitin 2013 ndonëse humbën zgjedhjet parlamentare të vitit 2017 edhe pas kulmit politik që arriti lideri i tyre me çadrën e cila u mbyll disa ditë para këtij debakli.
Sot, sërish me 20.000 demokratë më pak Lulzim Basha është Kryetar i PD, por kjo nuk mjafton!
Sot Lulzim Basha duhet të jetë Kryetar i ri i PD duke kthyer fillimisht besimin tek mbështetësit e tijë, në mënyrë që të vazhdoj betejën për rrëzimin e Edi Ramës; Por, që kjo betejë të merr tjetër kuptim, Kryeministrit Edi Rama dhe propagandës së tij duhet ti zbrazen urgjentisht karikatorët me armatimin që ai nuk e ndryshon që nga viti 1997!
Kunati, dikur legjendë urbane, gjatë fushatës për Kryetar ai mori guximin të jetë prezent edhe në debatet mbi rivalët e Lulzim Bashës që nxiteshin në rrjetet sociale. Sa ka ndikuar në drejtimin ose vendimet e Kryetarit të PD në të kaluarën sot nuk ka asnjë rëndësi, por propaganda e Edi Ramës ka bindur edhe gjithë stafin e partisë, se ata punojnë në Shqup dhe aty është boss Kunati.
Për të shuar gjithë këtë gëlqere me të cilën Edi Rama bëri pis Partinë Demokratike dhe bashkëpunëtorët e paaftë që zgjidhi vetë Kryetari, Kryetari i ri i PD duhet të deklarohet edhe publikisht për pamundësinë e ndikimit të Kunatit ndaj vendimeve dhe autoritetit të Lulzim Bashës.
Që është madhor dhe i domosdoshëm ky gjest, Kryetari mund edhe të mos bindet por vërtetësinë e tij mund ta konfirmoj lehtësisht me një sondazh të pavarur i cili do ta konfirmoj një fakt alarmant me Kryetar pa vëlla dhe baba në selinë e PD ama me një Kunat që është kudo, edhe aty ku nuk është Kryetari!
Oligarkët e Edi Ramës zunë vend madhor që nga mungesa e mbështetjes së protestës në Rrugën e Kombit kur u vendos trau i Qet Kastratit. Sot pak rëndësi ka reklamat e cilit oligark i menaxhon Kunati dhe cili është ndikimi i Qetit, Samir Manes ose Klodi Allajbeut, por e rëndësishme është që Kryetari i ri i PD të gdhihet me një elektorat para të cilit zotohet se me ardhjen në pushtet nuk ka oligark që do të amnistohet, dhe të gjithë të përfolurit ti rendit në bazë të alfabetit dhe jo ndikimit që kanë te Rama, Berisha ose Kunati!
Kryetari i ri i PD nuk ka pse premton anulimin e koncesioni të Rrugës së Kombit deri në skadimin e tij ama mund të premtoj hetim për evazion fiskal që nga dita e funksionimit të traut meqë 5 euro nuk u paguan kurrë; Sipas kursit të Bankës së Shqipërisë, kurrë për asnjë ditë 660 lekë, sa paguhet kalimi, nuk ishin 5 euro.
Kryetari i ri i PD nuk ka pse premton heqjen e traut të Qetit kur kontrata është e kopsitur juridikisht ama mund të premtoj vendosjen e një trau në Surrel, në rrugën që të çon në shtëpinë e Kryeministrit edhe me çmim 100 euro/ për kalim!
Kryetari i ri i PD nuk ka se pse u premton dëmshpërblimin e shtëpive në Unazën e Madhe të cilat i prishi Kryeministri Rama ama mund të premtoj një “rrugë strategjike” që të çon në Dajt dhe kalon mes përmes shtëpisë së Edi Ramës, e cila do të prishet pasi të dëmshpërblehet sipas çmimit të referencës!
Është përfolur shumë blerja e Hotel Sheratonit! Kryetari i ri i PD duhet të premtoj se do të vejë dorë seriozisht mbi turizmin duke përfshirë edhe hotelin të cilin nuk e menaxhoj dot njëra ndër kompanitë më të njohura në botë, dhe e blen njeriu që ka një Auto Grill me paçe, turli e fasule në Rrugën e Kombit!
Samir Mane nën sundimin e Edi Ramës mund ta merr përsipër nxjerrjen jo vetëm të kromit nga nëntoka shqiptare, ama Kryetari i ri i PD duhet të premtoj se ata minatorë që nxjerrin pasuritë natyrore shqiptare do të marrin paga të dinjitetshme dhe nuk do të ketë më kurrfarë tolerance për kushtet në të cilat do të punohet në minierë, pavarësisht se kush e menaxhon.
Kryetari i ri i PD duhet të premtoj edhe hetimin e devijimit të autostradës Tiranë-Elbasan. Pavarësisht qëllimit të devijimit, TEG-ut, Edi Ramës ose Samir Manes pikat mbi “i” për këtë turp kombëtar duhet të vihen dhe demokratët si në opozitë ashtu dhe në pushtet, të mos rrinë të mendojnë se pse lideri i tyre me raste është “i butë” ose “toleron”!
Spitali që blen Spitale duhet të ndalohet jo pse është i Klodit por se është spitali më i përfolur në gjithë Evropën Juglindore. Kryetari i ri i PD duhet të zotohet se me ardhjen në pushtet do ta vejë drejtësinë në vend duke filluar nga raporti i KLSH që tregon se kemi të bëjmë me një Spital kriminal dhe jo Amerikan! Borxhet që i konstaton KLSH nuk duhet të shuhen por të likuidohen aq më shumë kur janë borxhe ndaj shtetit shqiptar ndërsa shteti duhet të vejë dorë mbi këtë aktivitet për të mos lejuar që një spital si Hygeia të falimentoj vetëm për tu shitur te Spitali që blen Spitale!
Si e bleu televizionin Spitali që blen Spitale ndoshta nuk ka rëndësi për Kryetarin e PD, por Kryetari i ri i PD nuk do të ketë asnjë kompleks si ndaj oligarkut ashtu dhe medies që ai ka nën zotërim për punët e tij!
Sorosi! Mund të jetë tabu për shumë individë, të rrinë e mendojnë se si ta njollosin Kryetarin e PD, por Kryetari i ri i PD duhet të vendos për çdo telenovelë që transmetohet dhe mund ti jepet fund me një dalje të vetme publike lidhur me këtë fondacion kriminal që dëmtoi rëndë si demokracinë, ekonominë ashtu dhe rendin kushtetues në Shqipëri.
Është i nevojshëm deklarimi publik si për qëndrimin ndaj këtij fondacioni ashtu dhe aktivitetit kriminal të tij në tokën shqiptare që nuk do të tolerohet më.
SHBA! Kryetari i ri PD njëherë e mirë duhet të shprehet për partnerin tonë strategjik duke mos lënë insinuata për demokratët të cilët me raste, në mungesë të një reagimi të liderit të tyre, i japin vetes të drejtë ta sulmojnë edhe Ambasadorin e SHBA. Antiamerikanizmi i demokratëve për të cilin flet Edi Rama dhe patronazhistët është shumë më pak i rëndësishëm se sa fryma që ka filluar të krijohet ndër demokratë, dhe vetëm Partisë Demokratike nuk i duhet.
Dhe në fund, Sali Berisha! Është e rëndë për një Kryetar të PD edhe për shumë kohë të flas për ndikimin e liderit historik Sali Berisha ndër demokratë por nuk është aspak e vështirë që Kryetari i ri i PD të marrë përgjegjësitë dhe të deklarohet se çdo vendim i bazuar në Statut është vendimi i tij dhe askujt tjetër. Dhe jo vetëm kaq!
Meqë Kunatit të Berishës i është treguar me kohë kufiri te thana, është detyrë e Kryetarit të ri të PD që si djalin, vajzën ashtu dhe dhëndrin e ish liderit historik ti zhvesh nga petku që i ka veshur Edi Rama, e me ca raste kanë marr guximin ta përdorin edhe vetë.
Sa do të jetë i besueshëm ky zotim dhe kjo performancë, këtë do ta vulos vetëm koha, por është detyrë e Kryetarit të ri të PD, Lulzim Basha, të marrë përgjegjësitë duke mos i lënë evazive si fjalët që lançohen për qëllime të caktuara nga bashkëpunëtorët ose familjarët e Sali Berishës ashtu dhe ato dashakeqe që gëlojnë në media.
Ndryshe, Partia Demokratike s’do bëhet me Kryetar të ri por do të ngelet me atë që ishte edhe para 13 Qershorit, e servilët duke i shkundur pluhurin nga shpatullat Kryetarit, do ta degdisin PD-në në partinë e gjinushëve, të cilën mund ta blejë në të ardhmen edhe njëri nga oligarkët e Edi Ramës, jo me fajin e tij por nga mosveprimi i opozitës dhe liderit të saj! Pasi i blenë të gjitha, çdo bënë i shkreti, do vazhdoj duke ngrënë kos. Jo! Do blejë, pse jo, dhe partinë e lirisë!
