Kurban Bajrami, mesazhi i kreut KMSH: Shoqëria jonë ka nevojë për më shumë dashuri, drejtësi e shpresë

Duke uruar të gjithë besimtarët myslimanë festën e Kurban Bajramit, kreu i Komunitetit Mysliman të Shqipërisë, H.Bujar Spahiu thekson se kjo festë kujton vlerat e sakrificës, përkushtimit ndaj Zotit dhe kujdesit për njëri-tjetrin, ndërsa shoqëria jonë ka nevojë për më shumë dashuri, drejtësi e shpresë.

“Kurban Bajrami është një ndër festat më të rëndësishme të besimit islam. Është festa e sakrificës, e bindjes ndaj Zotit, solidaritetit dhe dashurisë për njeriun. Ajo na rikujton shembullin e Profetit Ibrahim, i cili me devotshmëri tregoi besim, durim dhe përkushtim ndaj Krijuesit. Ky mesazh mbetet edhe sot një thirrje e fuqishme për të forcuar moralin, përgjegjësinë dhe humanizmin në jetën e përditshme.

Në këto ditë të bekuara, mijëra besimtarë nga e mbarë bota ndodhen në tokat e shenja të mekës për të kryer Haxhin, simbol i unitetit, barazisë dhe përkushtimit ndaj zotit. Besimtarë të gjuhëve, kulturave dhe kombeve bashkohen në një adhurim të përbashkët, duke dëshmuar se feja jonë ndërtohet mbi paqen, respektin dhe vlerat njerëzore universale. Kjo festë na fton të reflektojmë më shumë për njëri-tjetrin, të jemi më pranë familjeve, të moshuarve dhe njerëzve në nevojë, jetimëve dhe çdo zemër që ka nevojë për mbështetje e shpresë,” thekson kreu i Komunitetit Mysliman të Shqipërisë duke nënvizuar edhe rëndësinë që paraqet festa në një kohë kur bota përballet me sfida dhe konflikte të shumta.

“Kurban është akt solidariteti, ndarjeje dhe kujdesi për tjetrin në një kohë kur bota përballet me sfida të shumta, konflikte, pasiguri dhe vështirësi sociale, mesazhi i Kurban Bajramit merr një rëndësi edhe më të madhe. Kemi nevojë më shumë se kurrë për mirëkuptim, dialog, respekt dhe bashkim mes njerëzve,” kreu i Komunitetit Mysliman të Shqipërisë, H.Bujar Spahiu, në mesazhin e tij për Kurban Bajram duke përfunduar:

“Shoqëria jonë ka nevojë për më shumë dashuri, drejtësi e shpresë. Shqipëria ka ruajtur harmoninë fetare dhe kjo është vlerë  çmuar që duhet ta ruajmë e forcojmë çdo ditë.

Uroj që festa të sjellë gëzim në familje, shëndet dhe mirësi për shoqërinë tonë.”