Kursimi i energjisë elektrike në Kosovë, 175 mijë familje subvencionohen për muajin janar

Ministri i Financave, Punës dhe Transfereve, Hekuran Murati, ka bërë të ditur se 174.642 familje kanë përfituar nga subvencionimi në faturat e energjisë eklektike për muajin janar të këtij viti.

Janë rreth 175 mijë familje që kanë shpenzuar më pak energji elektrike krahasuar me janarin e vitit paraprak sesa janari 2022 dhe që kanë përfituar nga subvencioni.

Kështu thekson ministri i Financave, Hekuran Murati duke shtuar se tashmë është procesuar pagesa për këtë subvencionim.

“MFPT ka procesuar pagesën e subvencionit edhe për muajin janar për të gjitha familjet që kanë kursyer energjinë elektrike. Shumë familje kanë paguar më pak se kurdoherë për faturat e energjisë elektrike gjatë muajve të dimrit. Janë 174,642 familje që këtë janar kanë shpenzuar më pak sesa janari 2022, dhe kanë përfituar nga subvencioni,” bënë të ditur Hekuran Murati.

Në shtator, Qeveria e Kosovës ka miratuar një vendim që i obligon institucionet publike, qendrore e lokale, si dhe të gjitha ndërmarrjet publike që të jenë “racionale në konsumim të energjisë” – me fokus të veçantë te ngrohja dhe ndriçimi.

Kjo, sipas vendimit, nënkupton që të ndalet ngrohja në ato zyra apo objekte, ku nuk ka prezencë fizike, si dhe në të gjitha korridoret.

Qytetarët e Kosovës janë përballur me reduktime të gjata me rrymë, për shkak të rënies së prodhimit vendor – si pasojë e disa riparimeve në termocentrale – dhe kostos së lartë të importit të energjisë elektrike nga jashtë.

Që atëherë janë shpeshtuar edhe thirrjet e autoriteteve për sa më shumë kursime.

Kosova ka kapacitet të prodhojë rreth 800 megavate rrymë në orë, ndërsa nevojat e saj, në ditë dimri, arrijnë deri në 1.300 megavate në orë. Këtë diferencë, ajo e importon nga jashtë./Monitor/