Kurti: Afati kushtetues po afron, zgjedhjet e parakohshme nuk janë opsion
Kryeministri i Kosovës, Albin Kurti, në mbledhjen e sotme të Qeverisë tha se vendi po i afrohet afatit kushtetues për zgjedhjen e presidentit, duke theksuar se zgjedhjet e parakohshme nuk janë opsion dhe se përgjegjësia bie mbi deputetët për të gjetur një zgjidhje përmes kompromisit politik.
“Situata kërkon vullnet politik dhe kompromis nga të gjitha partitë. Asnjë subjekt politik nuk mund të sigurojë i vetëm 80 apo më shumë deputetë,” tha Albin Kurti duke bërë thirrje që diskutimet të zhvillohen mbi bazën e rezultateve zgjedhore dhe në interes të vendit.
Kosova ka nevojë për stabilitet institucional dhe parashikueshmëri, tha Kryeministri Kurti duke rikujtuar se qytetarët kanë votuar për një mandat katërvjeçar dhe se së shpejti do të procedohet për miratim programi qeverisës 2026–2030.
“Një cikël i ri zgjedhor nuk do të sillte ndryshime të mëdha në rezultat, por do të vononte proceset, do të krijonte kosto shtesë dhe do të rrezikonte humbjen e mundësive dhe fondeve,” tha Kurti duke bërë të ditur se Komisioni Evropian ka nisur transferimin e mjeteve të parafinancimit për Kosovën në kuadër të Planit të Rritjes, pas miratimit në Qeveri dhe ratifikimit në Parlament.
“Nga 61.8 milionë euro të parapara, 28.74 milionë euro tashmë janë bartur në buxhetin e shtetit në formë kredie, ndërsa pjesa tjetër prej 33.04 milionë euro do të realizohet përmes Kornizës Investuese për Ballkanin Perëndimor. 17.73 milionë euro janë grante dhe 15.31 milionë euro kredi,” sqaroi Kurti duke shtuar se këto mjete do të shfrytëzohen për projekte infrastrukturore.
Kurti: Drejtësi të plotë për rastin Banjska
Kryeministri i Kosovës, Albin Kurti, ka mirëpritur arrestimin e Stefan Radulloviçit, i dyshuar për përfshirje në sulmin terrorist në Banjskë të Zveçanit në shtator të vitit 2023.
Në mbledhjen e sotme të Qeverisë, Kurti e cilësoi këtë veprim si një hap të rëndësishëm drejt vendosjes së drejtësisë për rastin, duke theksuar se përgjegjësit duhet të dalin para drejtësisë.
“Mirëpresim arrestimin e Stefan Raduloviç, i lidhur me sulmin në Banjskë të Zveçanit, ku u vra rreshteri Afrim Bunjaku. Ky është një hap përpara dhe drejtësia bëhet e plotë vetëm kur bashkëpunëtorët dhe kryeterroristi Milan Radoiçiq me grupin e tij vihen para drejtësisë në Republikën e Kosovës,” tha Kryeministri i Kosovës, Albin Kurti.
Ndërkohë Qeveria e Kosovës po sot ka shpallur organizatë terroriste Korpusin e Gardës Revolucionare Islamike të Iranit, IRGC.
“Përmes këtij vendimi, Kosova e forcon qëndrimin e saj në mbrojtjen e sigurisë ndërkombëtare, vlerave demokratike dhe të drejtave të njeriut. Ky është rreshtim i qartë i Kosovës përkrah aleatëve të vet strategjikë në luftën e përbashkët kundër terrorizmit,” tha Kryeministri Albin Kurti duke e përshkruar IRGC-në si strukturë që e përdor terrorizmin dhe dhunën e organizuar si instrument të politikës së jashtme, duke kontribuuar në destabilizimin rajonal dhe global.
Ndryshe, Korpusi i Gardës Revolucionare Islamike të Iranit është krahu ideologjik i ushtrisë së Teheranit dhe u krijua pas revolucionit të vitit 1979 për ta mbrojtur udhëheqjen klerikale.
