Kurti: Qeveria s’pajtohet me Draftin e Statutit të Asociacionit që imiton Republikën Srpska
Vizionin për Draftin e Statutit të Asociacionit do të konkretizoj nëse ka pajtueshmëri në parim për shtyllat e tij. Kështu u shpreh Kryeministri i Kosovës, Albin Kurti, në seancën plenare të Parlamentit të Kosovës.
“Unë këtu mund të thellojë vizionin për statutin e Asociacionit, por thellimi i kësaj nënkupton pajtueshmëri në parim,” tha Albin Kurti duke sqaruar se nuk mund të shkruajë statutin e Asociacionit dhe pastaj të kërkohet një kompromis për atë, pa pasur në fillim pajtim për parimet e tij.
“Pra kur të pajtohemi në parim, përfshirë edhe ato shtyllat që ju i përmendën që unë i kam thënë në parim, atëherë lirisht mund të thellojmë tekstin!”
Duke u përgjigjur në pyetjet e deputetes së PDK-së, Ariana Musliu Shoshi në lidhje me këtë çështje, Kryeministri u shpreh se nuk mund të shkruhen tekste alternative ndërmjet të cilëve mund të gjendet një mesatare aritmetikore pa u pajtuar njëherë në parim.
Albin Kurti tha se vizioni i tij i prezantuar është bazuar në modelin kroat për pakicat kombëtare kurse përsëriti mospajtimin me Draftin e Statutit të Asociacionit, të hartuar nga ish-ekipi menaxhues, të cilin e ka shkarkuar.
“Qeveria ime nuk është pajtuar me Draftin e ekipit menaxhues pasi imitonte në përmbajtje dhe formë Republikën e Serbe në Bosnje dhe Hercegovinë,” tha Kryeministri duke shtuar se ka propozuar një Draft vizion për të zbatuar Nenin 7. të marrëveshjes bazë dhe në lidhje me Nenin 10.
“Tash e tutje mund të diskutojmë në kuadër të dialogut të Brukselit për zbatimin e nenit shtatë të marrëveshjes sipas vizionit tim të prezantuar në Bruksel, i cili prezanton shkronjën dhe frymën e Kushtetutës së Republikës sonë, konsensusin trans-atlantik të vlerave demokratike dhe liberale”.
Ky reagim i Kryeministrit të Kosovës, Albin Kurti, nga foltorja e Parlamentit të Kosovës, pasi Kryeministri i Shqipërisë, Edi Rama, bëri të ditur se e ka dorëzuar një Draft të Statutit të Asociacionit të komunave me shumicë serbe, te Presidenti i Francës, Emmanuel Macron, dhe Kancelari i Gjermanisë, Olaf Scholz.
Për këtë dokument, ai tha se ka vënë në dijeni Shtetet e Bashkuara dhe Presidentin e Këshillit Evropian.
