Kurti: Serbia dëshiron ta destabilizojë Kosovën e të marrë territor të saj
Serbia po sillet si “Rusi e vogël”, tha Kryeministri Albin Kurti duke konstatuar se Serbia nuk dëshiron paqe, nuk dëshiron të anëtarësohet në NATO dhe BE.
Duke folur për televizionin austriak ORF, Kurti tha se Serbia dëshiron ta destabilizojë Kosovën dhe të marrë territor që ta kompensojë humbjen e luftërave.
“Serbia e di që s’mund ta ketë të gjithë Kosovën por janë vënë pas veriut, ku shumica e strukturave ilegale janë prezentë për më shumë se 24 vjet që nga përfundimi i luftës. Serbia nuk dëshiron paqe, nuk dëshiron të anëtarësohet në NATO dhe BE dhe dëshiron ta destabilizojë vendin tonë dhe të marrë territor që ta kompensojë humbjen e luftërave,” tha Kurti për ORF duke folur edhe për sulmin terrorist të 24 shtatorit.
“Dhjetëra terroristë paramilitarë erdhën nga Serbia dhe vranë rreshterin e Policisë së Kosovës, Afrim Bunjaku, në Zveçan, në komunën veriore dhe ata sollën me vete pajisje të shumta ushtarake dhe municione. Vlera e tyre është mbi 5 milionë euro, të prodhuara në Serbi në dy fabrika, Slloboda dhe Zastava arms në vitet e fundit,” tha Kurti duke përmendur se Radojçiç e pranoi se e ka organizuar sulmin dhe se është parë shumë shpesh të ulet pranë presidentit serb Vuçiç.
“Disa ditë pas këtij sulmi terrorist ai u arrestua në Serbi dhe u lirua brenda disa orësh. Presidenti i Serbisë është në krye dhe mbrapa këtij sulmi derisa përpara janë kriminelët që i njohin nga krimi i organizuar në Veri dhe në kufirin me Serbinë,” tha Kryeministri i Kosovës duke vlerësuar se shenjat e Serbisë janë gjithandej në këtë akt agresioni dhe duhet të dënohet nga BE-ja dhe SHBA-ja.
Lidhur me rikthimin e çështjes së shkëmbimit të territoreve, Kryeministri Albin Kurti ishte i prerë duke kontatuar se kjo ide nuk ka vdekur.
Gjatë një interviste për “ZIB 2”, Kryeministri u shpreh se në zgjidhjen e situatës në rajon do të ndihmonte një balancim në të drejtat e minoriteteve.
Sipas Kryeministrit të Kosovës, Albin Kurti, shkëmbimi i territoreve është një recetë për luftë dhe gjakderdhje. Gjatë administratës së kaluar amerikane, është përmendur ideja për shkëmbim të territoreve,tha ai, dhe është ende e gjallë në Beograd, por që nuk do të bëhet kurrë realitet ndërsa përfundoi:
“Kosova është Republikë, që qëndron e bashkuar!”
