Kurti: Xhudoja model për zhvillimin e sportit kosovar, synimi “Prishtina 2030”

“Xhudoja na ka treguar se çfarë mund të arrijë Kosova kur talenti shoqërohet me punë afatgjatë, profesionalizëm dhe standarde të larta,” tha Kryeministri në detyrë i Kosovës, Albin Kurti, në takim kryemjeshtrin Driton Kuka, trajnerët dhe ekipin e xhudos, ku diskutuan për sukseset e fundit të sportistëve kosovarë dhe për planet e zhvillimit të sportit në vitet e ardhshme.

Me këtë rast, Albin Kurti ka vlerësuar paraqitjen e ekipit të xhudos në Lojërat Mesdhetare në Taranto, ku Laura Fazliu fitoi medaljen e argjendtë, ndërsa Akil Gjakova, Flaka Loxha, Fatjona Kasapi dhe Shpati Zekaj siguruan medalje të bronzta.

“Pas secilës prej tyre qëndrojnë vite pune, disipline dhe një sistem që ka dëshmuar se rezultatet e mëdha nuk vijnë rastësisht,” tha Kurti gjatë takimit ku janë analizuar rezultatet e arritura në Lojërat Mesdhetare dhe është diskutuar për përgatitjet që duhet të bëhen në katër vitet e ardhshme, në prag të organizimit të Lojërave Mesdhetare “Prishtina 2030”.

Albin Kurti tha se modeli i xhudos duhet të shtrihet edhe në sportet e tjera ndërsa vlerësoi në veçanti kontributin e Kryemjeshtrit Driton Kuka, si dhe të trajnerëve Majlinda Kelmendi dhe Fatos Tabaku.

Në fund, Kryeministri në detyrë i Kosovës, Albin Kurti, duke theksuar se objektiv i institucioneve është që suksesi i xhudos të shërbejë si shtysë për ngritjen e standardeve në të gjithë sportin kosovar, përfundoi:

“Synimi ynë është që kultura e rezultateve dhe standardeve të larta të forcohet edhe më tej në të gjithë sportin kosovar.”