Lajçak: Drafti për Asociacionin, pikënisje e rëndësishme për diskutim

“Ngjarja më e madhe e javës ishte padyshim takimi i dialogut të nivelit të lartë i organizuar nga BE dhe i ndihmuar nga unë, që u zhvillua të martën e kaluar,” tha Përfaqësuesi i BE-së për dialogun, Miroslav Lajçak pas takimit me diplomaten zvicerane, Livia Leu, ku temë diskutimi ishin Asociacioni i Komunave me shumicë serbe dhe çështja e të zhdukurve.

“Presidenti Vuçiç dhe kryeministri Kurti u takuan në Bruksel për të diskutuar një çështje vendimtare të personave të zhdukur. Jam i kënaqur që të dy udhëheqësit ranë dakord të punojnë së bashku për të sqaruar vendndodhjen e njerëzve që u zhdukën gjatë luftës,” tha Miroslav Lajçak përmes rrjetit social Facebook duke shtuar se Drafti i paraqitur nga ekipi menaxhues për Asociacionin, është pikënisje e rëndësishme për diskutimet e ardhshme.

Sllovaku thotë se mirëpret miratimin e palëve të deklaratës për personat e zhdukur dhe “pret që ato të bëjnë përparim në mbylljen e rasteve të pazgjidhura të personave të zhdukur”.

“Kjo jo vetëm që do t’i ndihmojë familjet e tyre të gjejnë paqe, por edhe do të avancojë normalizimin ndërmjet Kosovës dhe Serbisë”, deklaroi Lajçak.

Ndërsa sa i përket Asociacionit, Lajçak thotë  se palët gjithashtu bënë një hap të rëndësishëm dhe simbolik drejt themelimit të Asociacionit/Bashkësisë së komunave me shumicë serbe.

“Megjithëse drafti i parë i paraqitur nga ekipi drejtues nuk është përfundimtar, ai është një pikënisje e rëndësishme për diskutimet e ardhshme në nivelin e kryenegociatorëve.’’