Leposaviç, sulmohet Policia dhe KFOR-i , arrestohet një serb

Pas sulmit me shishe mbi xhamin e automjeteve zyrtare të Policisë së Kosovës dhe të KFOR-it, mëngjesin e sotëm në Leposaviç, personi u identifikua dhe u arrestua me një xhaketë të ushtrisë me emblemë serbe.

Policia njoftoi se sot në orën 04:05, gjatë patrullimit të përbashkët me KFOR-in amerikan në fshatin Miokovicë, një person ka bllokuar rrugën me një veturë të tipit “Seat” e më pas i ka goditur. I dyshuari më pas ka ikur, por Policia dhe KFOR-i e kanë identifikuar shtëpinë e të dyshuarit dhe e kanë arrestuar.

“Policia e Kosovës bashkë me KFOR-in kanë identifikuar shtëpinë dhe kanë kryer kontroll ku është arrestuar i dyshuari mashkull kosovar, i cili ka pranuar se ka bllokuar rrugën dhe ka hedhur shishen. Gjatë realizimit të kontrollit në shtëpinë e të dyshuarit është gjet një xhaketë e ushtrisë me emblemë serbe,” thekson Policia e Kosovës përmes një njoftimi duke përfunduar:

“Vetura me të cilën është bllokuar rruga është sekuestruar, i dyshuari pas intervistimit nga njësia kompetente e hetimeve është liruar në procedurë të rregullt, përderisa hetimet lidhur me rastin janë duke vazhduar.”