Liderët e shteteve nga e gjithë bota në ceremoninë e varrimit të Mbretëreshës Elizabeth II

Në ceremoninë e varrimit të Mbretëreshës Elizabeth II e cila pritet të zhvillohet më 19 shtator do të marrin pjesë shefat e shteteve dhe qeverive nga e gjithë bota si dhe disa mbretëresha dhe mbretër evropianë.

Shtëpia e Bardhë ka bërë të ditur se në ceremoni do të marrë pjesë Presidenti i SHBA, Joe Biden, me bashkëshorten Jill.

Zëdhënësi i Presidentit të Gjermanisë ka konfirmuar për Agjencinë gjermane të lajmeve DPA, se Frank Walter Steinmeier do të marrë pjesë më 19 shtator në ceremoninë e varrimit.

Ndërkohë edhe Zyra e Presidentit të Italisë, Sergio Mattarella ka bërë të ditur se do të marrë pjesë në varrimin të Mbretëreshës Elizabete II ku gjithësesi numri i pjesëmarrësve do të jetë i kufizuar për shkak të ambientit të planifikuar në Pallatin Mbretëror Westminster, ku dhe fillon ceremonia. 

Mësohet se në ceremoninë e varrimit do të marrin pjesë edhe anëtarët e familjeve mbretërore nga Spanja, Belgjika, Norvegjia, Danimarka, Suedia dhe Holanda.

Ceremonia e varrimit do të filloi mesditën e 19 shtatorit në Pallatin Mbretëror Westminster në Londër ndërsa Mbretëresha Elizabeth II do të prehet në Kishën e Shën Gjergjit në Pallatin Windsor.

Ndryshe, Mbretëresha Elizabeth II ndërroi jetë të enjten në moshën 96 vjeçare ndërkohë i biri Charles u bë automatikisht Mbreti i ri.