LIVE/ Nis Kuvendi Kombëtar i PD me 4.920 delegatë prezent

Pas intonimit të himnit kombëtar, Kryetari i Këshillit Kombëtar të PD, Edi Paloka, hapi Kuvendin Kombëtar ndërsa në ekranin e transparencës figuronte 4.920 delegatë prezentë.

“Kjo ditë do hyjë në historinë e Partisë Demokratike dhe të gjithë shqiptarëve. Jo vetëm sepse për herë të parë mblidhet një Kuvend me kërkesën e demokratëve, as për numrin e jashtëzakonshëm të pjesëmarrësve, por sepse pas 31 vitesh mblidhemi për të rithemeluar PD-në mbi idealet dhe parimet mbi të cilat e ngritë,” tha Edi Paloka duke e konsideruar veten me fat që ishte pjesë e themelimit të PD duke shtuar:

“Sot pas kësaj dite, ne do themi me krenari që unë isha aty në ditën kur u rithemelua PD. “Pas 25 prillit, Basha nuk u pozicionua përballë regjimit, por në krah të tij, duke e kthyer PD-në në një opozitë fasadë. Për këtë arsye jemi mbledhur këtu për të kuvenduar. Jemi mbledhur për të rikthyer shpresën dhe besimin jo vetëm te demokratët, por te të gjithë shqiptarët se opozita e vërtetë, kjo këtu, nuk ka vdekur dhe as nuk e ka ulur kokën, aq më tepër të hyjë në pazare me Ramën, por është gati të përballet me regjimin,” tha Kryetari i Këshillit Kombëtar të PD, Edi Paloka, duke futur në proces votimi Komisionin për Punimet e Kuvendit dhe Sekretariatin ndërsa përfundoi:

“Po ju paraqes për miratim emrat e Komisionit që do të drejtojnë punimet e Kuvendi. Ervin Minarolli, sekretar organizativ i PD, Ivi Kaso sekretar zgjedhor i PD, Edmond Spaho, ish-nënkryetar, Belind Kellici kreu i FRPD, drejtues i Komisionit. Për Sekretariatin propozohen Minushe Nazaj , Nade daullja dhe Ledio Nuraj . Ti miratojmë këto propozime me dorë, se kush është pro. Kundër nuk ka. Ftojmë Sekretarinë që të zëjë vend në podium. Suksese të gjithëve vëllezër.”

Nga lidershipi aktual i PD vërehet se mungojnë Kryetari i PD, Lulzim Basha dhe Sekretari i Përgjithshëm, Gazment Bardhi, që nuk iu përgjigjën ftesës së lideriti historik Sali Berisha.