Lobimi/ Basha në Prokurori: S’ka fakte, s’ka pastrim parash, s’ka rus. Akuzë e Edi Ramës!

Ishte thirrë në Prokurori për të dëshmuar për lobimin në SHBA, akuzën e vulosi Ulsi Manja duke e sqaruar “të painformuarin” Edi Rama se bëhet fjalë për pastrim parash, Taulant Balla e konfirmoi nga foltorja e Parlamentit për 1 milion dollarët rus që i kishin shërbyer PD-së për të lobuar në Shtetet e Bashkuara, Prokuroria përsëri ngriti zërin duke e kërcënuar se do të shoqërohet me dhunë, por sot kur Kryetari i Partisë Demokratike, Lulzim Basha, iu përgjigj ftesës së Pokurorisë, pas “30 minutave që u mor në pyetje” e konfirmoi se prokurorët e çështjes nuk kishin as dosje, as prova, as dëshmi mbi transaksionet e pastrimit të parave dhe asnjë rus. Thjeshtë, tha Basha, kemi të bëjmë me një akuzë të montuar në zyrën e Edi Ramës për llogari të Edi Ramës.

“Arsyeja e vetme pse unë jam sot para jush është që të shërbej si shpërqendrim për ju dhe për qytetarët, për skandalet që kanë plasur nga “Bild” dhe ato që janë njoftuar se do të plasin nesër. Kjo është arsyeja e vetme pse sot jam këtu, para jush. Prokuroria nuk ka asnjë fakt, nuk ka asnjë provë ndryshe apo shtesë që nga 25 maji, kur unë isha këtu për herë të fundit. Zyrtarisht më komunikuan se nuk ka asgjë të re që nga 25 Maji. Kjo, për një arsye të thjeshtë, sepse kjo akuzë është montuar në zyrën e Edi Ramës, për llogari të Edi Ramës.”

Lulzim Basha sqaroi me këtë rast se ndonëse ishte thirrë madje edhe kërcënuar për shoqërim me dhunë, Prokuroria nuk kishte dosje, nuk kishte asnjë fakt:

“U njoha me akuzën që s’është akuzë, sepse nuk ka asnjë fakt, asnjë provë, s’ka asnjë dokument të falsifikuar në dosje, s’ka asnjë transaksion për pastrim parash, nuk ka asnjë rus të vetëm, nuk ka asgjë.

Pra, është një akuzë e formuluar me një qendrim, t’ju shpërqendrojnë ju dhe qytetarët nga skandalet që kanë plasur, të Bild-it, si dhe nga skandalet që do të plasin nesër nga Bild-i, që demonstrojnë se ku e ka katandisur shtetin Edi Rama.

Dosjen ju thashë të ma vënë në dispozicion sot, se s’e kishin gati. Nuk e kishin gati dosjen, se s’kanë dosje. Pra, është një çështje e montuar në zyrën e Edi Ramës për llogari të Edi Ramës. Nuk kanë asnjë provë, asnjë fakt, nuk ka asgjë ndryshe nga 25 Marsi kur kam qenë herën e fundit këtu. Ka vetëm diçka ndryshe. Është BILD-i.”

Dhe jo vetëm kaq! Kryetari i Partisë Demokratike tha se ishte për herë të pestë në Prokurori me arsye të çuditshme që i shërbyen vetëm Edi Ramës:

Herën e parë kam qenë kur plasi skandali i Sajmir Tahirit.

Herën e dytë më thirrën, kur plasi skandali i Geron Xhafës.

Herën e tretë më thirrën, kur plasi skandali i Rrahman Rrajes dhe i Taulant Ballës.

Herën e katërt më thirrën, kur plasi skandali i Vangjush Dakos. Në mos gabohem, edhe për skandalin e “Toyota Yaris”.

Kjo është hera e pestë. Sa herë që plasin skandalet e kësaj qeverie të lidhur me krimin, këta riaktivizojnë një dosje ku nuk ka asnjë fakt, asnjë prove, për një arsye të thjeshtë, është montuar në zyrën e Edi Ramës për llogari të Edi Ramës,” tha lideri i opozitës pas daljes nga Prokuroria ndërsa sqaroi edhe faktin se pse pranoi të paraqitet sot dhe jo ditën që u thirrë:

“Për arsyen e thjeshtë, sepse atë ditë ata nuk zbatuan ligjin, ndërsa tani kishin një plan, të njëjtin plan që kishin nga fillimi, që unë të shërbeja si shpërqëndrim për skandalet e publikuara dhe ato që pritet të publikohen nga BILD-i.

Jam këtu për t’ju shpërqëndruar ju dhe qytetarët nga skandalet e BILD-it, por jam i bindur që ky mision do të dështojë me sukses të plotë. Për këtë pritet të shohim 24 orët e ardhshme.”

Në fund, Kryetari i PD, Lulzim Basha, ka shuar edhe kuriozitetin e gazetarëve nëse ka frikë se mos drejtësia do të veprojë edhe mbi te:

“Këtu ku jemi, ka plot njerëz të frikësuar. Disa prej tyre sapo i takova, por unë nuk jam njëri prej tyre. Faleminderit, mirupafshim, punë të mbarë!”