Lulzim Edvin Basha rikthehet me “8 Janarin II”, FNSH ngelet duarthatë por jo dhunuesit e ballkonit

Lulzim Basha rikthehet në Partinë Demokratike të vulës e me të edhe dhuna! Pasi i përdori për ta luftuar Sali Berishën, për të zgjedhur strukturat e reja dhe për ti dhuruar të pabindurëve një “8 Janar”, sot Lulzim Edvin Basha i dhuron po këtyre bashkëpunëtorëve tashmë të pabindur për rikthimin e tij në krye të partisë duke i cilësuar dhe berishtistë, “8 Janarin II”, me dallimin e vetëm, duke lënë duarthatë policët e Edi Ramës, dhunë për të cilën u kujdesën të fortët e Bashës të njohur nga ballkoni i zyrës !

Pas përplasjeve të ashpëra me dhunë verbale dhe fizike, ata që ishin kundër zgjedhjes së kryetarit pa e kryer analizën e zgjedhjeve të 14 Majit dhe zgjedhjet në bazë, të akuzuar si “berishistë” braktisë mbledhjen, dhe ishin ata që kryesuan lëvizjen kundër Sali Berishës, Kryetari i Grupit Parlamentar, Gazmend Bardhi dhe deputeti Dashnor Sula.

Përballë një Kryesie që tashmë kontrollohet nga Lulzim Edvin Basha dhe nuk do t’ia dijë më se çfarë mendon Grupi Parlamentar, këtë mbledhje kriminale u detyruan ta braktisin edhe Jorida Tabaku, Sajmir Koreshi, Bledion Nallbati, Helidon Bushati e Lefter Gështenja por kjo nuk ndryshoi asgjë që pas 8 orësh, të merret vendimi për hapjen e garës së menjëhershme të zgjedhjeve për kryetar në 29 korrik. 

Ndërkohë grupi besnik i Lulzim Edvin Bashës për arritjen e qëllimit me dhunë kundër demokratëve, Ish-Kryetari Nënkryetar, Enkelejd Alibeaj, Ish-Shpëtimtari i PD, Roland Bejko dhe dezhurni i tenderave të Edi Ramës, Agron Kapllanaj, dhe Ish-Shefi i dërgimit të ushtarëve në misione e NATO-s me lekë, Xhemal Gjunkshi kryesuan edhe misionin e fundit për shkatërrimin final të Partisë Demokratike  

Meqë më nuk i d uhet Lulzim Edvin Bashës, në orët e para të mëngjesit të sotëm ishte Jorida Tabaku që dha dorëheqje nga posti i Nënkryetares së Partisë Demokratike.

Në fillim të mbledhjes ajo nuk pranoi propozimin e bërë nga Sekretari i Përgjithshëm të PD-së zyrtare, Gazmend Bardhi, që të ishte kryetare e komanduar e partisë deri në zgjedhjen e kryetarit të ri, por kjo si duket rriti tensionet edhe ma shumë ndër anëtarët e Kryesisë që nuk ishin ardhur me qëllim të gjetjes së një zgjidhje reale. 

“Nuk ka asgjë të keqe të kesh ambicie në politikë, është njerëzore, por në situatën ku ndodhemi besoj që prevalon interesi i përbashkët më shumë se ai vetjak, e për këtë arsye: Kam vendosur që të mos e pranoj propozimin e z. Bardhi për drejtimin e komanduar të Partisë Demokratike”, tha Tabaku, e cila bëri edhe një propozim për mbajtjen e zgjedhjeve në degë fillimisht e më pas hapjen e garës për kryetar.

Por anëtarët e karikuar të Kryesisë nga Lulzim Edvin Basha nuk u qetësuan edhe kur Kryetari i Grupit Parlamentar Gazmend Bardhi dhe deputeti Dashnor Sula ikën nga mbledhja dhe për ta u kujdesën ata që ishin para selisë duke i ofenduar edhe nga familja. 

Për deputetët Saimir Korreshi, Lefter Geshtenja, Bledion Nallbati dhe Helidon Bushati që u larguan nga mbledhja u kujdesën mbështetësit e Lulzim Edvin Bashës që ishin zhvendosur para Kryesisë së Parlamentit, pasi që deri në ato momente përgjatë gjithë mbledhjes kanë ushtruar presion duke hapur herë pas here derën e sallës ku po mbahej kjo mbledhje kriminale duke lëshuar klithma sharjesh ndaj anëtarëve të Kryesisë që janë kundër hapjes së procesit për garën e kryetarit. 

Në mungesë të FNSH-së si me “8 Janar”, për “8 Janarin II” u kujdesën militantët e Lulzim Edvin Bashës nën drejtimin e Drejtorit të Policisë Bashkiake Tiranë në kohën e Bashës, ku atyre të cilët i etiketuan si “berishistë” u dhuran edhe dhunë verbale, e pre e kësaj dhune ranë edhe gazetarët që po raportonin prej orës 18 para ambienteve ku po mbahej kjo mbledhje e kryesisë. 

Dhe, ai që u shit se kishte ra pre e dhunës së “8 Janarit”, Roland Bejko, si frankofon që është nuk u pa të mbrojë kolegët e tij të Kryesisë nga dhuna e “8 Janarit II” por nuk mungoi në barrikadën e dhunuesëve të Lulzim Edvin Bashës që hodhën poshtë propozimin e grupit parlamentar për të bërë fillimisht analizën dhe mbajtjen e zgjedhjeve nëpër degë e më pas zgjedhjen e kryetarit të partisë. 

Në fund, 17 anëtarët e Kryesisë së Partisë Demokratike të Lulzim Edvin Bashës, në orët e para të mëngjesit të ditës së sotme vendosën për hapjen e menjëhershme të garës dhe mbajtjen e zgjedhjeve për kryetar të PD-së në 29 korrik 2023. 

VENDIMI

PËR ORGANIZMIN E PROCESIT ZGJEDHOR PËR KRYETAR TË PARTISË DEMOKRATIKE

Në mbështetje të pikës 6, të nenit 10, neneve 24,25,45, 46 dhe 53 të Statutit të PDSH-së, duke vlerësuar situatën e vështirë që kemi kaluar, situatën aktuale të strukturave të partisë dhe vakancat e krijuara ne disa nivele duke filluar nga Kryetari i PDSH e deri në bazë, bazuar në kërkesën e Kolegjit të Kryetarëve për nevojën emergjente për zhvillimin menjëherë të zgjedhjeve për Kryetarin e PDSH si dhe riorganizmit të plotë të partisë, Kryesia e Partisë në mbledhjen e datës 6 Qershor 2023,

VENDOSI:

Fillimin e menjëhershëm të procesit të evidentimit të antarësisë, dhe organizimit të zgjedhjeve për kryetar të PDSH.

Në çdo degë të PD brenda datës 15 korrik kryhet procesi i plotë i evidentimit të antarëve me të drejtë vote sipas përcaktimeve të nenit 25 të statutit.

Kryetari i degës ngre grupin e punës të degës i cili ka për detyrë të kryejë evidentimin e antarëve me të drejtë vote;

Grupi i punës në degë bën evidentimin e antarësisë dhe strukturave në detyrë brenda datës 13 korrik.

Lista e përpiluar sipas formatit në aneksin 2 depozitohet pranë sekretariatit të PDSH.

Komisioni Zgjedhor përpilon listën kombëtare të antarësisë me të drejtë vote sipas përcaktimeve të nenit 25.

Organizimi i procesit për zgjedhjen e kryetarit të PDSH:

Procesi zgjedhor drejtohet nga Komisioni Zgjedhor i Partisë;

Pranë Komisionit Zgjedhor, secili kandidat paraqet kërkesën për kandidim brenda datës 20 Qershor 2023;

Fushata zgjedhore zhvillohet nga data 24 Qershor deri në datën 27 korrik 2023;

Zgjedhjet për kryetar të PDSH zhvillohen në datë 29 korrik 2023.

Kryesia e PDSH brenda datës 12 qershor 2023, cakton grupet e punës në nivel qarku që në bashkëpunim me deget mbikqyrin procesin e evidentimit te antarësisë;

Kuvendi i jashtzakonshëm statutor zhvillohet brenda muaji shtator 2023;

Ngarkohen Sekretari i Përgjithshëm, Sekretariati dhe Komisioni Zgjedhor për njoftimin dhe ndjekjen e zbatimit të këtij vendimi.

Ky vendim hyn në fuqi menjëherë.