Mafia shqiptare në katër shtete, Europol: 64 të arrestuar…

Arrestohen 64 persona, të dyshuar si anëtarë të mafies shqiptare.

Lajmi u bë i ditur përmes një njoftimi nga Europol, ku theksohet se ata u arrestuan gjatë një operacioni me 600 agjentë, i cili ka filluar më 3 Prill dhe është përmbyll sot ndërsa ishte shtrirë në Belgjikë, Francë, Itali e Holandë.

“Krimi i organizuar shqiptar vazhdon të mbetet një shqetësim për vendet në Evropë. Në mars, ekspertët mbi krimin shqiptar u mblodhën në selinë qendrore të Europol në Hagë për të diskutuar mënyrat për t’i trajtuar më mirë këto klane të dhunshme të mafias. Operacionet e mëtejshme të këtij lloji pritet të ndodhin në të ardhmen e afërt,” thuhet në njoftimin e Europolit.

Ndryshe, gjatë këtij aksioni, 55 persona u arrestuan në Belgjikë, 7 në Holandë dhe 2 të tjerë në Francë.

Të arrestuarit akuzohen për prodhimi dhe trafikim të lëndëve narkotike, trafik i qenieve njerëzore, prostitucion dhe pastrim parash.

Sipas Europol ata besohet se kanë menaxhuar të paktën një duzinë plantacionesh të kanabisit të shpërndarë në të gjithë Belgjikën dhe në veri të Francës, ndërsa disa të tjerë janë përfshirë në një rast të trafikimit të qenieve njerëzore në Francë.