Maqedoni e Veriut, Edi Rama dhe Albin Kurti zhvlerësojnë votën shqiptare
Raundi i parë zgjedhjeve presidenciale në Maqedoni të Veriut, përveç zhvlerësimit të votës shqiptare dhe ekzaltimit pa lidhje të Zv/Kryeministrit Artan Grubi që si asqer i Edi Ramës krenohej me ngadhnjimin e Bujar Osmanit ndaj asqerit të Albin Kurtit, Arben Taravari, tregoj dhe një herë se lider i pakontestueshëm shqiptar aktualisht është vetëm Kryetari i BDI, Ali Ahmeti, por që e ka fronin në rrezik! Pse?!
Pesë vjet më parë, sapo u shpall kandidati i Aleancës për Shqiptarët dhe Lëvizjes Besa, Blerim Reka, ai iu nënshtrua sulmeve si nga partitë në pushtet ashtu dhe Tirana zyrtare me në krye Edi Ramën. Në këto rrethana, Blerim Reka me kartën evropiane arriti të marrë në raundin e parë 79.888 vota ose 10.6 për qind nga gjithsejtë 753.520 votues që kishin ushtruar të drejtën kushtetuese.
U konsiderua si fitore e Edi Ramës vetëm pse dështoi Blerim Reka, ndonëse përkundër avantazhit të ngushtë që u konstatua se kishte krijuar përdhunuesi i votës shqiptare dhe kandidati i LSDM-së, Stevo Pendarovski, me 322.581 vota ose 42.25 për qind, ndaj Gordana Silanovska Davkova të VMRO-DPMNE me 318.341 vota ose 42.18 për qind, pjesëmarrja ishte shumë e ulët 41.67 për qind, dhe lider ishte dhe mbeti Ali Ahmeti edhe pse nuk kishte kandidat zyrtar në zgjedhje!
Në mes të dy të këqijave, shqiptarët vendosën të votojnë sugjerimin e Edi Ramës, dhe përdhunuesi i votës shqiptare dhe kandidati i LSDM-së, Stevo Pendarovski, u zgjodh president në raundin e dytë!
Stevo Pendarovski e konsumoi mandatin e tij pa ndonjë mirësjellje ndaj kësaj vote shqiptare, por gara e radhës për President të Maqedonisë tregoi se shqiptarët janë vetë ata që i komplikojnë gjërat!
Ndërhyrjeve banale të Kryeministrit të Shqipërisë, Edi Rama, në votën shqiptare të Maqedonisë së Veriut iu shtua Kryeministri i Kosovës, Albin Kurti, duke krijuar dy pole të painteresuara për fitore në zgjedhjet presidenciale 2024.
Prezenca e pakuptimtë e Albin Kurtit në fushatën zgjedhore të kandidatit të koalicionit VLEN, Arben Taravari, u kritikua nga të gjithë duke përfshirë dhe Tiranën zyrtare!
Por, mbrëmja e së vërtetës dëshmoi se as Edi Rama nuk ishte pa gjë, dhe se ishte në kampin rival shqiptar me të dyja këmbët, ndonëse deri në mbrëmjen e 24 Prillit qarkullonte vetëm si legjendë urbane! Gjithsesi nuk i pengoi njeriu, dhe nuk kishte se si të ndodhte ndryshe kur nuk i pengonte kandidatëve maqedonë!
Çfarë na mësoi rezultati i raundit të parë të zgjedhjeve presidenciale në Maqedoni të Veriut ku pjesëmarrja ishte 49 për qind, dhe e para u rendit Gordana Silanovska Davkova e VMRO-DPMNE ku mori 362.682 vota ose 40.08 për qind, pasuar nga Stevo Pendarovski i LSDM me 180.306 vota ose 19.93 për qind, Bujar Osmani i Frontit Evropian 120.903 13.36 për qind e Arben Taravari i koalicionit VLEN 83.356 vota ose 9.21 për qind.
Fillimisht për VMRO-DPME dhe kandidaten e pandryshuar Gordana Silanovska Davkova e cila mori 40.08 për qind! Duke pasur parasysh se në votime dolën 7.33 për qind më shumë se pesë vjet më parë kur Davokava mori 42.18 për qind ose 44.341 vota më shumë, mund të konstatohet se retorika e saj antieuropiane doli e suksesshme, por që radhët e kësaj partie janë lëkundur dhe fajtori mund të gjendet në retorikën antibullgare që u përdor gjatë kësaj fushate të egër presidenciale!
Blloku tjetër i majt dhe proeuropian nuk dha ndonjë rezultat pavarësisht nëse u fol shqip ose maqedonisht, ngeli i katandisur si mos më keq!
Stevo Panderovski i LSDM-së proserbe dëshmoi se u përfaqësua nga një politikë e korruptuar, përveç se e konsumuar, dhe fitorja e tij pesë vjet më parë nuk ishte aksidentale, por, e arritur ekskluzivisht me votat shqiptare!
Ndërsa shqiptarët, gërditshëm të majtë, na dëshmuan se janë aty për të ngadhynjer mbi njëri tjetrin! Shfaqja e Artan Grubit në mbrëmje ende pa folur kandidati i Frontit Europian dhe liderët e koalicionit ishte e çuditshme, por, biseda e telefonike që zhvilloi para kamerave dhe që shumë shpejtë u konfirmua se ishte duke fol me Edi Ramën, dëshmoi dhe arsyen pse Grubi është realisht në BDI!
Çfarë i tha Albin Kurti kandidatit dhe gjithë koalicionit VLEN të gjithë e dëgjuan sepse ishte deklaratë publike, ndërkohë çfarë i tha Edi Rama asqerit të tij në BDI, Artan Grubi, nuk kishte ndonjë interes. Jo pse Kryeministri i Shqipërisë nuk ka se çfarë thotë, por përmbajtja e bisedës së liderit të një partie ku 99 për qind e anëtarësisë e dinë se shqiptarët në Maqedoni të Veriut vazhdojnë të jenë kosovarë të Maqedonisë, dhe Kongresi i Alfabetit në Manastir u mbajtë në Bitola, kjo nuk zgjon kurreshtje tek asnjë shqiptarë madje as shqipfolës që vetëm tmerrohet nga marrëzitë socialiste shqiptare.
Ndoshta nuk kishte se si të ndodhte ndryshe me BDI-në kur u prek nga Batoni me kompaninë e tijë, por shqetësuese është se si kjo kastë e morrave të kuq, bazuar në ekzaltimin e shprehur, synim vetvetes i kishin vënë të ngadhnjejnë ndaj koalicionit shqiptar dhe jo p.sh. LSDM-së, që nga rezultati tashmë na rezulton se me një mobilizim serioz është e arritshme!
Dhe, sot, të gjithë ata eksponentë të Bashkimit Demokratik për Integrim të kryesuar nga Artan Grubi e Bujar Osmani, që iu gëzuan largimit të fraksionit të fundit nga BDI që e mendojnë ndryshe drejtimin e partisë, tashmë me këtë rezultat e kanë të qartë se, po, Edi Rama ka zhvlerësuar votën shqiptare sepse në Maqedoni të Veriut nuk ka vetëm shqiptarë evropianë, por, lider në këtë parti ishte dhe është Ali Ahmeti, dhe votat që i mori Bujari u siguruan nga lideri i partisë dhe jo broçkullat e tij me OSBE-në; Dhe, po ato vota e ndoshta edhe më shumë, do ti merrte çdo anëtar i Grupit që aq shumë u anatemua dhe në fund edhe u dekorua me, Zjarr!
Në fund, sot VLEN e kuptoi që duhet shumë punë për ta zhdukur BDI-në nga faqja e dheut përderisa drejtohet nga Ali Ahmeti, ashtu siç e kuptuan dhe Artan Grubi me shokë se duhet shumë punë për të arritur synimet e tyre manipulative, që me shumë lehtësi i kanë realizuar në organizatat joqeveritare!
