Marrëveshje kredie 302 milionë $, SHBA: Do të mbështesë progresin e Shqipërisë
Duke bërë të ditur ratifikimin dhe nënshkrimin e marrëveshjes së kredisë prej 302 milionë $ të Shqipërisë në kuadër të programit Foreign Military Financing, FMF, Shtetet e Bashkuara theksojnë se kjo marrëveshje do të mbështesë progresin e Shqipërisë dhe modernizimin e Forcave të Armatosura Shqiptare.
Në njoftimin zyrtar Departamenti Amerikan i Shtetit thekson se kredia do ta ndihmojë Shqipërinë të përmbushë angazhimin e miratuar në samitin e Hagës për rritjen graduale të shpenzimeve për mbrojtjen në 5% të Prodhimit të Brendshëm Bruto, PBB, deri në vitin 2035.
SHBA vlerëson gjithashtu Shqipërinë si një aleate të NATO-s, duke theksuar se ajo ka qenë e harmonizuar ngushtë me Uashingtonin në çështje kyçe të politikës së jashtme.
“Shtetet e Bashkuara janë krenare të njoftojnë ratifikimin dhe nënshkrimin nga Shqipëria të një kredie të re prej 302 milionë dollarësh për Financimin e Huaj Ushtarak, FMF, e cila do të mbështesë progresin e Shqipërisë drejt përmbushjes së Angazhimit të Mbrojtjes për të shpenzuar 5 përqind të PBB-së për mbrojtje deri në vitin 2035.
Kredia e FMF-së do të ndihmojë në modernizimin e forcave të armatosura të Shqipërisë duke mbështetur prokurimin e kapaciteteve kryesore me origjinë nga SHBA-ja dhe duke forcuar aftësinë e Evropës për të udhëhequr mbrojtjen e vet.
Si një aleate e NATO-s, Shqipëria është lidhur ngushtë me Shtetet e Bashkuara në çështje kritike të politikës së jashtme, duke përfshirë edhe rolin e anëtares themeluese të Bordit të Paqes të Presidentit Trump”, thuhet në njoftimin e DASH.
Pas njoftimit të DASH ka reaguar dhe ministri i Mbrojtjes, Ermal Nufi, duke theksuar se votëbesimi strategjik i SHBA ndaj Shqipërisë është një hap historik në modernizimin e mbrojtjes shqiptare.
“Mirënjohje Shteteve të Bashkuara të Amerikës për partneritetin e palëkundur strategjik dhe mbështetjen e vazhdueshme në ndërtimin e një mbrojtjeje më të fortë për Shqipërinë, rajonin e më gjerë. Kjo mbështetje do të përshpejtojë modernizimin e kapaciteteve tona ushtarake, do të rrisë gatishmërinë operacionale dhe do të forcojë kontributin e Shqipërisë për sigurinë kolektive të Aleancës,” shprehet Ermal Nufi përmes rrjetit social Facebook.
Ndryshe, kjo marrëveshje u ratifikua në Parlament vetëm me votat e deputetëve socialistë, PD nuk mori pjesë në votim dhe e çoi në Gjykatë Kushtetuese procedurën e miratimit, duke pretenduar se u bë në kundërshtim me Kushtetutën.
