Maska që “vret” koronavirusin mbërrin në Kroaci!

Maskat e prodhuesit izraelit nuk dallojnë nga maskat kirurgjike për një përdorim. Por në material është inkorporuar oksidi i bakrit me përmbajtje antivirusi dhe antibakteriale.

Maskat duke filluar prej sot kanë filluar të shpërndahen përmes kompanisë Medika dhe së shpejti do të jenë nëpër farmacitë e Kroacisë, shkruan gazeta kroate “24 sata”.

“Çmimi i një maske do të jetë rreth 40 kuna (7.5 euro) dhe në furnizimin e parë kemi siguruar 128 mijë copë, po kjo është vetëm për fillim. Presim porosi të reja, pasi që na janë lajmëruar nga Serbia, Hungaria, Austria dhe Zvicra, se janë të interesuar për blerje,” janë shprehur nga kompania “Rinigard” që është dhe importuesi i kësaj maske duke sqaruar se në varësi nga sasia e porositur do të ndryshoj edhe çmimi në të ardhmen.

Maska e cila për nga pamja nuk ndryshon nga maska kirurgjike klasike, mund të përdoret për një kohë të shkurtër, deri sa fizikisht të mos shkatërrohet, laget me ujë ose bëhet pis. Në përditshmëri  mund të përdoret deri në një muaj.

Pa ndërprerje, maska mund të përdoret deri në 3 orë, pastaj duhet ta hiqni, ta vendosni në një sipërfaqe të rrafshët dhe la lëni për 40 minuta në mënyrë që përmbajtja e materialit të neutralizojë patogjenet.

Shkencëtarët izraelit që shpikën dhe zhvilluan këtë maskë u bazuan në teknologjinë për përpunimin e fashës dhe pajisjeve tjera ushtarake, dhe e veçanta e saj është se efikasiteti i saj nuk ulet me kalimin e kohës.

Maska i shërben mjekëve dhe të gjithë njerëzve që dëshirojnë të mbrohen nga koronavirusi.