Mbledhja e qeverive Mali i Zi-Shqipëri, firmoset marrëveshja për ndërtimin e Urës mbi lumin Buna!

Kryeministri i Malit Zi, Dritan Abazoviç, dhe ai i Shqipërisë, Edi Rama, firmosën sot në Podgoricë marrëveshjen dypalëshe për ndërtimin e Urës mbi lumin Buna. 

Pas mbledhjes së përbashkët të qeverive të Malit Zi dhe Shqipërisë u firmosën nëntë marrëveshje dhe memorandume për energji, shëndetësi, mbrojtjen sociale, mbrojtjen e bimëve, peshkim, sport, kulturë dhe media.

Marrëveshje tjetër e rëndësishme për shqiptarët që u firmos sot në Podgoricë nga dy kryeministrat Rama-Abazoviç është dhe ajo për hapjen e pikës së përbashkët kufitare Shën Nikollë – Pulaj, në territorin e Shqipërisë, si dhe marrëveshja për mirëmbajtjen dhe menaxhimin e përbashkët të peshkimit në liqenin e Shkodrës dhe lumin e Bunës.

Ndryshe, Ura mbi lumin Buna e gjatë 310 metra dhe e gjerë 17 metra, e cila do të lidhë 34 kilometra të plazhit me rërë që vizitohen nga rreth 530 mijë turistë çdo vit, distancën aktuale mes Ulqinit dhe Velipojës prej 73 kilometrave do ta reduktoj në vetëm një kilometër. Ura do kushtojë rreth 20 milionë euro dhe pritet të përfundojë brenda 18 muajve.

Kjo është mbledhja e dytë e përbashkët e Qeverive të Shqipërisë dhe Malit të Zi, pas asaj e cila u zhvillua në Shkodër, në korrik të vitit 2018.