Mbrojtësi i lulushëve në Parlament, Taulant Balla: Sali Berisha nuk ekziston!

Kryetari i Grupit Parlamentar të PS-së, Taulant Balla, avancoi në kërcënimet ndaj Partisë Demokratike ndryshe nga shefi i tij Edi Rama dhe e bëri të qartë se nuk do të pres as zgjedhjen e Kryetarit për të ndërprerë marrëdhëniet me PD nëse ai është Berisha, por sot tha se për Partinë Socialiste, Sali Berisha nuk ekziston kështu dhe nuk do të ketë bisedime për zgjedhjen e Presidentit të ri të Republikës.

“Me Sali Berishën as nuk ka, as nuk do të ketë ndonjëherë negociata për asgjë. Sali Berisha për ne nuk ekziston dhe me diçka që nuk ekziston nuk ke pse negocion. Unë di që në Kuvendin e Shqipërisë ekzistojnë të depozituara si grupe parlamentare ai i Alibeajt, Doda dhe Mediu. Ky është një proces ekskluziv brenda mureve të Kuvendit të Shqipërisë,” tha Taulant Balla i cili mbrojti lulushët edhe në foltoren e Parlamentit ndërsa dha edhe datën se kur do të mbahen bisedimet me opozitën.

“Ne do propozojmë që të mbahet më 4 maj që tre përfaqësuesit e PS-së, jemi të gatshëm të ulemi me opozitën në çdo moment. Ka pasur një propozim nga ana e z.Mediu që tre grupet e opozitës të përcaktojnë një përfaqësues të tyre. Sa kohë nuk kanë dakordësi, na duhet të negociojmë me 3 grupet. Nëse do kenë dakordësi të vijnë të tre së bashku, janë të mirëpritur. Sa kohë që nuk kemi negociuar gjithë negocimin e nevojshëm që duhet të bëjmë që na e detyron Kushtetuta dhe tradita parlamentare, nuk kemi ne dëshirë të zgjedhim një President vetëm me votat tona. Kemi dëshirë të zgjedhim një president me sa më shumë konsensus parlamentar. Ne duhet të negociojmë me të gjitha grupet e opozitës.”

Nuk pranoi të jap emra por kur të ketë dakordësi për një profil të Presidentit të ri, Balla tha se do të ketë dhe propozime konkrete.

“Sot nuk jemi në fazën të shprehemi për emra apo propozime konkrete. Do vijë një moment tjetër gjatë procesit, kur të jemi dakord me profilin, do vijmë dhe me emrin. Zarfat janë hapur dhe janë administruar, janë aty për të formësuar shortlistat e profileve të ndryshme të cilët janë propozuar nga anëtarët e grupit parlamentar.”

Në fund, Kryetari i Grupit Parlamentar të PS, Taulant Balla, u shpreh se sa i takon negociatave me opozitën për emrin e Presidenti të ri, do të presin deri në 24 maj, datë kur sipas Kushtetutës është dhe afati i fundit.