Mbyllet faza e përzgjedhjes në BKH, Ambasada e SHBA: Vështirë, për të gjetur më të mirët e Shqipërisë!

Me përmbylljen e përzgjedhjes së kandidatëve për Byronë Kombëtare të Hetimit, BKH ka reaguar Ambasada e SHBA në Tiranë duke uruar kandidatët ndërsa shton:

“Jo të gjithë ia dolën sepse procesi është i vështirë, por i domosdoshëm, për të gjetur më të mirët e Shqipërisë!

Ndryshe, nga 403 kandidatë për Byronë Kombëtare të Hetimit, vetëm 103 kanë arritur që ta kalojnë testin e aftësive fizike, 300 prej tyre janë skualifikuar ndërsa janë vetëm 60 prej tyre që do jenë pjesë e BKH.

Më 26 tetor, këta kandidatë do t’i nënshtrohen testit të esesë me shkrim cili do të zhvillohet në Pallatin e Kongreseve.

Pas testit të esesë, i pret vettingu dhe makina e së vërtetës.

Njoftimi i BKH

Komisioni i Përzgjedhjes në datë 23.10.2020, mbylli procesin e Testit për Aftësitë Fizike dhe përzgjedhjes së kandidatëve, për fazat e mëtejshme të konkurrimit. Për të parë listën me kandidatët e kualifikuar, shikoni listën e kandidatëve që gjendet në LINK 1, bashkëlidhur.

Kandidatët e kualifikuar, në datën 26.10.2020, do t`i nënshtrohen Testit të Esesë me shkrim. Testi i Esesë do të zhvillohet në Pallatin e Kongreseve, udhëzimet mbi zhvillimin e testit gjenden në LINK 2, bashkëlidhur. Testimi i Aftësive Fizike u zhvillua nën vëzhgimin dhe monitorimin e Komisionit Ndërkombëtar të Ekspertëve, të caktuar nga misionet e Qeverisë së Shteteve të Bashkuara të Amerikës dhe Bashkimit Europian në Shqipëri.

Falenderojmë gjithë aplikantët që shprehën vullnetin për të marrë pjesë në këtë konkurrim.