Me krerët e Grupeve Parlamentare PD-PS, Kim: Refuzim përpjekjeve për të minuar demokracinë!

Bashkëpunimi i të gjitha partive politike, për të rritur transparencën dhe përgjegjshmërinë e të gjitha institucioneve, për të refuzuar përpjekjet për të minuar demokracinë e Shqipërisë, ishte theksi në takimet të cilat të i zhvilloi Ambasadorja e SHBA në Tiranë, Yuri Kim, me krerët e Grupeve Parlamentare të PD, Enkelejd Alibeaj, dhe PS, Taulant Balla, me qëllim të përmirësimit të rolit mbikëqyrës të Parlamentit.

“Ambasadorja Yuri Kim u takua sot me Kryetarët e Grupeve Parlamentare Taulant Balla (PS) dhe Enkelejd Alibeaj (PD) për të diskutuar një gamë të gjerë çështjesh në agjendën e Parlamentit dhe marrëdhëniet dypalëshe SHBA-Shqipëri.

Ambasadorja Kim nënvizoi rëndësinë që ka bashkëpunimi i të gjitha partive politike, për të rritur transparencën dhe përgjegjshmërinë e të gjitha institucioneve, për të refuzuar përpjekjet për të minuar demokracinë e Shqipërisë, për të përmirësuar rolin mbikëqyrës të Parlamentit dhe për të çuar Shqipërinë para me vendosmëri drejt përmbushjes së kërkesave për anëtarësimin e plotë në Bashkimin Evropian,” shprehet Ambasada amerikane në Tiranë përmes një njoftimi në rrjetin social Facebook duke përfunduar:

“Ajo theksoi gjithashtu që tani është koha për të shtuar përpjekjet për zbatimin e reformës në drejtësi, të cilën Parlamenti e kaloi njëzëri në 2016 dhe që po fillon të tregojë rezultate.”

Ndryshe, takimi i Ambasadores amerikane në Tiranë, Yuri Kim, me krerët e Grupeve Parlamentare të PD dhe PS vjen pas  publikimit të lajmit nga Zëri i Amerikës bazuar në raportin e shërbimeve inteligjente të SHBA, për infiltrimin rus në politikën e disa vendeve, dhe financimin e politikanëve në këto vende, ku përfshihet dhe financimi me 500 mijë dollarë të Ish-Kryetarit të Partisë Demokratike, Lulzim Basha, në zgjedhjet e vitit 2017.