Merkel-Orban më 5 korrik takohen në Berlin

Kancelarja gjermane Angela Merkel do të takohet me kryeministrin hungarez, Viktor Orban më 5 korrik në Berlin.

Këtë e ka konfirmuar zëdhënësja e kancelares gjermane Ulrike Demer, duke shtuar se Merkel dhe Orban do të bisedojnë  për marrëdhëniet dypalëshe  dhe çështjet ndërkombëtare, dhe pas takimit do të mbajnë edhe një konferencë për shtyp, raporton MTI

Orban viziton Berlinin pas samitit të BE ku njëra prej temave kryesore ishte trajtimi i emigrantëve.

Kryeministri hungarez, pas vendimit të liderëve të BE, ka transmetuar një video në profilin e tij në Facebook, ku thekson se është miratuar propozimi i Grupit të Vishegradit dhe se Hungaria nuk do të bëhet vend i emigrantëve.

Sipas propozimit të  Grupit të Vishegradit, askush nuk mund të transferohet nga një kamp refugjatësh në një vend tjetër, pa miratimin e atij vendi, thekson MTI.

Çështja e emigrantëve është një sfidë e madhe për kancelaren Merkel, si në kuadër të BE ashtu edhe në Gjermani, sepse partneri i saj i kaolicionit CSU, në krye të të cilit është ministri i brendshëm Horst Zehofer, i ka vënë kusht që sa më shpejtë të gjejë zgjidhje për këtë çështje ose Gjermani do të filloj të kthej refugjatë nga kufiri i saj.