Mesazhi për Pashkët, Imzot Arjan Dodaj: Ringjallja e të kryqëzuarit, forcë për mbarë njerëzimin

Ringjallja e të kryqëzuarit ka domethënie e forcë që vlen për mbarë njerëzimin. E shohim në shumë vëllezër e motra të pafajshëm, viktima të padrejtësisë të dhunës e luftës, tha Arqipeshkvi i Arqidioqezës Metropolitane Tiranë-Durrës, Imzot Arjan Dodaj, në mesazhin e Pashkëve duke uruar besimtarët katolikë për festën e shenjtë që shkon përtej grigjës së tij.

“Me Krishtin në këto pashkë shohim betejën mes jetës e vdekjes. Rrënojat, pandemia e lufta kanë shënuar jetën e shumë personave, e kjo duhet të na nxisë të duam më shumë jetën,” tha Imzot Arjan Dodaj duke sjellë shembullin e Nënë Terezës, kërkoi triumfin e dritës duke ia adresuar mesazhin e tij qartësisht plagës së madhe të shoqërisë sonë.

“Ta ndërtojmë së bashku jetën me shumë përgjegjësi në vendin tonë. Të ftoj bashkëkombasit e mi shqiptarë që së bashku të marrin përgjegjësinë që ta mundin errësirën që gllabëron shoqërinë në rrugën pa dalje ku është futur që është korrupsioni,” tha Arqipeshkvi i Arqidioqezës Metropolitane Tiranë-Durrës, Imzot Arjan Dodaj në mesazhin e tij duke përfunduar:

“Korrupsioni është pasojë e një zemre të trembur e të frikësuar që fsheh kokën si një struc. Të çlirohemi nga borxhi që ndjejmë përmes ryshfetit kur kërkojmë një vend pune.”