Ministri i Mbrojtjes: Partneriteti i Kosovës me SHBA është i përjetshëm!

Pasi Ambasadori i SHBA në Kosovë, Jeffrey Hovenier, bëri të ditur se Kosova është përjashtuar nga stërvitjet Defender Europe 2023 dhe situatës së nderë që u krijua ndër qytetarët shqiptarë në Kosovë, ka reaguar dhe Ministri i Mbrojtjes, Armend Mehaj duke garantuar se Partneriteti me Shtetet e Bashkuara është i përjetshëm.

“Partneriteti me Shtetet e Bashkuara të Amerikës është i përjetshëm, i tillë ka qenë dhe do të mbetet gjithmonë.

Ushtria jonë është ngritur para se gjithash duke pasë mbështetje të fuqishme nga ShBA-të, jam i bindur që zhvillimi i mëtutjeshëm i yni do të vazhdojë edhe më tutje,” tha Armend Mehaj në reagimin e tij përmes rrjetit social Facebook duke përfunduar:

“Ne ndajmë vlera dhe parime të njëjta, paqe dhe siguri për të gjithë pa dallim. Anëtarësimi ynë në NATO mbetet prioritet për ne sepse vetëm kur të arrihet kjo mund të kemi paqe të qëndrueshme.”

Ndryshe, Ambasadori i SHBA në Kosovë, Jeffrey Hovenier, sot bëri të ditur se Qeveria e Kosovës nuk është koordinuar me Shtetet e Bashkuara për veprimet e ndërmarra në veri dhe, për këtë arsye, ka pësuar pasojën e parë: “Stërvitjet Defender Europe 2023 kanë marrë fund!”