Ministrit të Brendshëm, Tomor Alizoti: A i thua dot emrat e bosëve të drogës!

Në Shqipëri ka një projekt të mirëfilltë për të vjedhur shqiptarët, tha deputeti i Partisë Demokratike, Tomor Alizoti nga foltorja e parlamentit ndërsa e sfidoi ministrin e Brendshëm, Taulant Balla, që të thotë emrat e bosëve të drogës në Elbasan.

“Në Shqipëri ka projekt të mirëfilltë për të vjedhur shqiptarët. Në Meksikë, në Kolumbi, ministrat e Brendshëm thonë me emra se kush bën trafik droge, ndërsa këtu nuk i thonë, një emër bosi të trafikut të lëndëve narkotike ta thonë. Ministri i Brendshëm nuk thotë dot një emër të një bosi droge dhe të tregojë grupet kriminale.

Më thoni kryeministër, ministra, se kush janë bosët e drogës në Shqipëri dhe kush ndërhyn në zgjedhje. Më thoni këtë fjalë, sepse vendi ynë është një shtet, ku po ikin shumë njerëz, sepse këtu e keqja është bërë normalitet,” tha deputeti i Partisë Demokratike, Tomor Alizoti duke përfunduar:

“Sfidoj ministrin e Brendshëm që të thotë emrat e bosëve të drogës së Elbasanit, po i tha është burrë zotëri.”

Ndryshe, ministri i Brendshëm, Taulant Balla, sot duke paralajmëruar vitin 2024 si goditjen përfundimtare ndaj fenomenit të kultivimit të kanabisit, përgëzoj Drejtoritë e Policisë Shkodër dhe Tiranë për rezultatet e 24 orëve të fundit.