Mirë se vjen 2022! Shqiptari i parë lindi në Tiranë

Fëmija i parë shqiptar i vitit 2022 lindi në orën 00:00 në Tiranë. Ai është djalë dhe lindi në maternitetin “Mbretëresha Geraldinë”! Mjeku Artur Hatibi bëri me dije se fëmija erdhi në jetë me operacion por gjendja shëndetësore e nënës dhe bebes është e mirë.

“Lindja e parë përfundoi me sukës. Lindi fëmija djalë, në peshën 3 kg e 680gr. Nëna dhe bebi gëzojnë shëndet të plotë. Nga ekipi i rojës, ju urojmë gëzuar të gjitha nënave të Shqipërisë, gëzuar dhe mbarësi!”, tha mjeku.

Ndërsa në orën 00:01 në Klinikën e Gjinekologjisë të QKUK-së në Prishtinë, ka lindur fëmija i dytë shqiptar ose e para për vitin 2022 në Kosovë.

“Foshnja e parë për vitin 2022 është e gjinisë mashkullore. Nëna është nga Prishtina, Hajrije Shabani dhe ky është fëmija i parë i saj” tha Drejtori i Klinikës, Jakup Ismaili.

Shqiptari i parë i lindur në vitin 2022 quhet Akid ndërsa nëna e emocionuar shprehet:

“Është fëmija i parë. Akid e ka emrin, është djalë. Falënderoj shumë stafin mjekësor. Edhe ju uroj të gjithë shqiptarëve, gëzuar!”

Ndërkohë, babai i të porsalindurit tha: “Në fakt është i vjetër, por edhe inovator pasi bashkëshortja i nis emri me A, dhe unë e kam me K, ndërsa ‘id’ është ID-ja”