Prishtinë, policia ndërpreu festimin e Vitit Ri në shesh

Ndryshe nga Tirana, në Prishtinë dhjetëra zyrtarë të Policisë së Kosovës tanimë janë në shesh ku kanë ndalur muzikën dhe kanë nisur shpërndarjen e qytetarëve të cilët po feston pritjen e Vitit Ri 2022 në shesh.

Kjo ndërhyrje e policisë vjen në zbatim të masave Anticovid, sipas së cilave në ora 24:00, ndalohet lëvizja e qytetarëve përveç atyre që janë raste emergjente dhe të lejuar në bazë të vendimit të Qeverisë.

Ndërkohë qytetarët e Kosovës edhe këtë vit kanë vazhduar pritjen e Vitit të Ri në gjirin familjar.

Ndryshe, rreth mesditës, Komuna e Prishtinës ka bërë të ditur se është anuluar performanca “Prite n’Shesh”, kjo bazuar në vendimin e Ministrisë së Shëndetësisë dhe Instituti Kombëtar të Shëndetësisë Publike të Kosovës, IKSHPK, për mbajtjen e rregullave të njëjta për parandalimin e përhapjes së variantit të virusit Omicron. Kështu ka bërë të ditur Komuna e Prishtinës nëpërmjet një komunikate për medie.

“Komuna e Prishtinës ju njofton se duke u bazuar në vendimin nr.01/46 të datës 30.11.2021 të Ministrisë e Shëndetësisë dhe IKSHPK-së për mbajtjen e rregullave të njëjta për parandalimin e përhapjes të variantit të ri të virusit Omicron, anulohen përformancat live në aktivitetin e organizuar nga Drejtoria e Kulturës “Prite n’shesh” me qëllim të ruajtjes së shëndetit të përgjithshëm publik,” thuhet në komunikatën për medie.

Ndërkohë që aktivitet e tjera në “Prite n’Shesh” do të vazhdojnë deri në orën 21:30, ndërsa bizneset në fushën e gastronomisë do të operojnë deri në orën 23:00.

“Gjithsesi, aktivitetet tjera të ‘Prite n’shesh’ vazhdojnë deri në orën 21:30, ndërsa bizneset në fushën e gastronomisë do të operojnë deri në orën 23:00,” ka bërë të ditur përmes komunikatës, Komuna e Prishtinës.