Misioni faktmbledhës i Holandës: Shqipëria nuk është gati për BE!

Shqipëria nuk është gati për BE! Kështu u shprehë misioni faktmbledhës i Holandës pas takimeve që zhvilloi me kryeministrin Edi Rama, kryetarin e opozitës Lulzim Basha dhe shoqërinë civile duke theksuar si problem të veçantë mosndëshkimin e zyrtarëve.

”Qeveria jonë është ekstremisht hezituese për hapjen e negociatave me Shqipërinë këtë moment. Prandaj ne si parlament vendosëm të organizojmë këtë mision faktmbledhës me anëtarë të 7 partive të ndryshme politike holandeze, pra, të gjitha partitë kryesore janë këtu. Më pas ne do te kemi një debat se si po shkon zbatimi i 5 prioriteteve. Anëtarët e delegacionit kanë bërë shumë pyetje ndër me kryesoret ato që lidhen me luftën ndaj korrupsionit dhe krimit të organizuar. Qeveria jonë do ta thotë fjalën e fundit, por përpara do të duhet të ketë aprovimin final nga parlamenti,” tha njëri nga anëtarët e misionit faktmbledhës nga Holanda, deputeti kristian demokrat, Pieter Omtzigt.

Delegacioni kryesohet nga Malik Azmani i Partisë për Liri e Demokraci me anëtarë: Anne Mulder nga Partia për Liri e Demokraci, Kees Verhoeven nga “Demokratët 66”, Bram Van Ojik të partisë “Të Gjelbrit e Majtë”, Frank Futselaar nga Partia Socialiste, Stieneke Van der Graaf  nga Unioni Kristian, Pieter Omtzigt nga Partia Kristian Demokrate dhe Jeffrey Van Haaste.