Morinë, arrestohet 39-vjeçari nga Peja me 11 kg heroinë 

Operacioni i koduar “Koordinimi” u finalizua në vend kalimin kufitar Morinë, me sekuestrimin e 11 kilogramëve heroinë dhe automjeti tip “Volkswagen” ku u gjet kjo lëndë narkotike si dhe arrestimi i 39-vjeçari nga Kosova, i cili transportonte drogën drejt Shqipërisë.

“Gjatë operacionit, në hyrje të Shqipërisë, u kap në flagrancë dhe u arrestua shtetasi kosovar A. K., 39 vjeç, banues në Pejë.

Gjatë kontrollit në automjetin tip “Volkswagen” që drejtonte ky shtetas, u gjetën 11 kilogramë lëndë narkotike e dyshuar heroinë e ndarë në pako, e cila u sekuestrua në cilësinë e provës materiale, së bashku me automjetin e 39-vjeçarit,” bënë të ditur Policia e Shtetit pas finalizimit të operacionit të bazuar në informacionet e siguruara nga inteligjenca policore, koordinimit dhe shkëmbimit të informacionit ndërmjet Policisë së Kukësit, shërbimit doganor Morinë dhe shërbimeve të Policisë Kufitare të Shqipërisë dhe Kosovës.

Ndryshe, vijojnë hetimet e përbashkëta për dokumentimin e kësaj veprimtarie kriminale, si dhe për identifikimin dhe kapjen e shtetasve të tjerë që mund të jenë implikuar në këtë rast.