Ndërpritet seanca konstituive, Albin Kurti kërkon kohë shtesë për diskutime

Punimet e seancës konstituive të Parlamentit të Kosovës u ndërprenë, pasi Kryetari i Lëvizjes Vetëvendosje, Albin Kurti ka kërkuar kohë shtesë për arritjen e marrëveshjes politike për emrin e një kandidati për president.

“Kërkojmë kohë shtesë që t’u japim shans bisedimeve politike për marrëveshje për president a presidente të re,” tha Albin Kurti ndërsa ka falënderuar liderin e PDK-së, Bedri Hamza dhe atë të LDK-së, Lumir Abdixhiku për takimet e mbajtura.

“Ato bisedime u pezulluan për shkak të zhvillimeve të brendshme në LDK. Rifillimi i bisedimeve u bë vetëm në këtë javë. Ne duam bisedime edhe me PDK-në, edhe me Aleancën, edhe pse refuzimi i tyre është i qartë. Duam të ecim përpara bashkërisht, por na duhet dakordimi sa më i gjerë për presidentin unifikues, ashtu siç e kërkon kushtetutshmëria për të cilën u betuam sot,” tha Kryetari i LVV.

Konstituimi i institucioneve nuk duhet të përfundojë me shpërndarjen e Parlamentit dhe mbajtjen e zgjedhjeve të reja.

“Konstituimi kësaj radhe nuk mund të jetë sërish drejt një shpërndarjeje të Kuvendit dhe përsëri zgjedhje të parakohshme e të paarsyeshme, të dëmshme për ekonominë. Andaj, i nderuari kryesues Avni Dehari, kërkojmë kohë shtesë që t’u japim shans marrëveshjeve për president apo presidente të re,” tha Kryetari i Lëvizjes Vetëvendosje, Albin Kurti ndërsa uroi 120 deputetët për betimin e mandatit të ri.

Ndryshe, 120 deputetët e legjislaturës së 11-të janë betuar në Parlamentin e Kosovës për mandatin e tyre të ri, pasi votuan Raportin e Komisionit të Përkohshëm për Verifikimin e Kuorumit dhe Mandateve të deputetëve.