Ndëshkohet Kosova por jo Serbia, favorizimi i krimit serb të radhës nga BE!
Bashkimit Evropian ka vendosur ta lë Kosovën jashtë granteve që BE ka miratuar për projektet në kuadër të Kornizës për Investime në Ballkanin Perëndimor. Përveç imazhit të keq të një shteti në zhvillim ku korrupsioni po prek nivelet minimale, ky vendim absurd që e rendit Kosovën së bashku me Republika Srpskën e kriminelit Milorad Dodik, bie në kundërshtim edhe me vetë Bashkimin Evropian i cili ka parashikuar që përmes këtij mekanizmi, në periudhën 2023-2030, në emër të integrimit të ndërtoj Autostradën e Paqes Prishtinë-Nish dhe hekurudhën Beograd-Prishtinë.
Për Kryeministrin Albin Kurti, masat ndëshkuese të BE-së ndaj Kosovës janë të padrejta dhe si të tilla e bëjnë dialogun asimetrik, ndërsa për qytetarët e Kosovës nuk është asgjë më shumë se favorizim i krimit serbë të radhës!
Kur këtij vendimi i shtohet dhe fakti se Kosova është trajtuar sikur se Republika Srpska që shkel Kushtetutën e Bosnje Hercegovinës, kërkon shkëputjen nga Federata duke shkel Marrëveshjen e Daytonit dhe nuk përfill vendimet e Përfaqësuesit të Lartë të BE, situata bëhet shumë më serioze!
Fillimisht qytetarët e Kosovës nuk u shqetësuan dhe aq shumë kur u informuan se Bashkimit Evropian kishte vendosur ta lë Kosovën jashtë granteve të Kornizës për Investime në Ballkanin Perëndimor, sepse kur u miratua liberalizimi i vizave për Serbinë në dhjetorin e vitit 2009 ata e përjetuan shumë keq, dhe për pak javë e kuptuan se Evropa është po ajo e vitit 1912, ajo e përkufizuar nga At Gjergj Fishta, si askush deri më sot, dhe nuk duhet lënë zhgënjimin të zë vend në shpirtin e vuajtur shqiptar!
Kosovarëve u ndihmoi në atë kohë që të relaksohen me vendimin komik të Këshillit Evropian i cili i liberalizoi vizat Serbisë me vërejtjen, se ato nuk vlejnë për qytetarët serbë të Kosovës! Por, këtë liberalizim, për pak javë u konfirmua se jo vetëm serbët e Kosovës por edhe batonët e buzhalët e gëzuan duke u pajisur me pasaporta serbe në qytetet e përcaktuara nga Aleksandar Vuçiç nëpër Serbi!
Nisur nga ky realitet, sot nuk kanë se si të jenë të relaksuar kur e kuptuan se ky vendim ndal financimet e Bashkimit Evropian për Kosovën, por, jo dhe për serbët e veriut të saj që vazhdojnë dhe gjuajnë edhe ushtarët e KFOR-it ndërsa projektet e tyre vazhdojnë të financohen nga Serbia me para të Bashkimit Evropian; Ngjashëm si me liberalizimin e vizave për Serbinë, liberalizim i cili i shërbeu dhe i shërben serbëve, batonëve dhe buzhalëve të Kosovës.
Por, me të kuptuar se vendimi i Bashkimit Evropian që me Kosovën e lë jashtë granteve që BE ka miratuar për projektet në kuadër të Kornizës për Investime në Ballkanin Perëndimor edhe Republikën Srpska të Milorad Dodikut, jo gjithçka qetësohet me të qenurit Evropë, dhe, siç e përkufizon At Gjergj Fishta: Kurvë!
Me plot të drejt u debatuan ndër shqiptarët e Kosovës, tre kërkesat e 22 Qershorit nga Përfaqësuesi i Lartë për Politikë të Jashtme dhe Siguri në BE, Josep Borrell, në emër të Bashkimit Evropian për Kosovën dhe Serbinë, lidhur me shtensionimin e situatës në veri, ku:
1.Kosovës i kërkohet që menjëherë të pezullojë operacionet policore në afërsi të ndërtesave komunale në veri dhe që katër kryetarët komunalë përkohësisht të ushtrojnë detyrat e tyre në objekte alternative
2.Serbisë i kërkohet të sigurojë që protestuesit të tërhiqen nga ndërtesat komunale paralelisht me tërheqjen e Policisë së Kosovës
3.Të dyja shteteve u kërkohet shpallja e zgjedhjeve të parakohshme lokale, sa më shpejt që të jetë e mundur, në katër komunat në veri të Kosovës, me pjesëmarrjen e pakushtëzuar të serbëve të Kosovës në to.
Dhe, pa folur politika qytetarët reaguan ashpër sepse nuk e kishin të qartë se si mund të pezullohen operacionet policore, kur atje krimi po rritet, si barazohen kriminelët serbë që protestojnë me policinë, dhe, ç’lidhje ka me shpalljen e zgjedhjeve lokale në Kosovë, shteti i Serbisë, ndonëse dihet që me urdhër të saj serbët lokal bojkotuan zgjedhjet!
Qershi krimi mbi veriun e Kosovës vjen vendimi i 4 Korrikut nga BE, kur ndonëse Serbia nuk ka plotësuar asnjërën nga këto pika në emër të shtensionimit të situatës, dhe Serbia na vlerësohet nga Brukseli zyrtar, qelibar!
Dhe, jo vetëm kaq! Me Kosovën renditet e vlerësuar Republika Srpska, e cila është vendi më i korruptuar në rajon, që nga krijimi ende nuk ka bërë zgjedhje të lira dhe të ndershme, nuk i ka vënë sanksione Rusisë, dhe si entitet i cili është krijuar me Marrëveshjen e Daytonit nën garanci të SHBA shkakton skandalin më të madh diplomatik me Shtetet e Bashkuara, duke publikuar stenogramin e takimit të Presidentit të saj Milorad Dodik me të dërguarin e SHBA për Ballkanin Perëndimor, Gabriel Escobar!
Escobar: Më duhet të them se sanksionet e reja për Ballkanin janë parashikuar për ata që pengojnë politikisht, por edhe ndaj atyre që kanë dobi nga kjo.
Dodik: S’më rruhet për sanksione. Ka kohë që i njoh. Nese dëshiron të bisedosh me mua, mos më kërcëno.
Escobar: Ky nuk është kërcëm, ky është fakt!
Dodik: Çfarëdo që të bëni, në rregull, është çështja juaj, por ti kthehemi retorikës. Këtë e dëgjojmë që 20 vjet, këtu po mundohuni të bëni njerëz të dëgjueshëm që vetëm duhet të flasin ajo që ju pëlqen, e në thelb, gjithçka që flisni sot se është problem në Bosnje Hercegovinë, e keni bërë ju, këto janë politika të juaja të gabuara, nuk janë tonat…”.
Debat të cilin e kishte bërë publik në cilësinë e anëtarit të Presidencës së Bosnje Hercegovinës në një konferencë për media në fillimtetorin e vitit 2021 (time code: 34:50).
Dhe, në ditët kur Bashkimi Evropian duhet të shqetësohet për veprimet e këtij krimineli që vazhdon e promovon politikën e Vladimir Putinit në zemër të Evropës, dhe shpreh mbështetjen për veprimet kriminale të serbëve në veri të Kosovës, si dhe në ditën kur Kryetarja e Komisionit Parlamentar të Punëve të Jashtme pranë Parlamentit të Mbretërisë së Bashkuar, Alicia Kearns, ngrit alarmin se nga Serbia në Kosovë po kontrabandohen armë përmes autoambulancave dhe po shkarkohen në kishat ortodokse, dhe se ato i pengon KFOR-i që të konfiskohen, nga Brukseli na vjen lajmi për ndëshkimin e Kosovës.
Cili është mesazhi për Kryeministrin e Kosovës, Albin Kurti, i këtij vendimi, i cili zhvillon takime kokë më kokë me Përfaqësuesin e Lartë Borrell dhe mëkëmbësin e tij Lajçak, në përpjekje për të shtensionuar situatën veri, këtë e dinë më mirë Josep Borrell dhe BE!
Por, mesazhi që përçon ky vendim për qytetarët e Kosovës përderia amniston Serbinë, nuk ka pse të kërkohet në takimet e Kurtit me Lajçak!
Ai e kthen Kosovën në ditët kur Akademia e Shkencave të Serbisë së bashku me Kishën Ortodokse hartonte plane për spastrimin etnik të tokës kosovare nga shqiptarët!
Një spanjoll si Borrell dhe një sllovak si Lajçak mund ta pengojnë rrugëtimin e shtetndërtimit të Kosovës, por, synimet e Slobodan Miosheviçit, për shumë arsye, nuk i realizojnë dot!
Ndryshe, Kosova, Republika Srpska dhe Mali i Zi kanë mbetur jashtë granteve që Bashkimi Evropian ka miratuar për projektet në kuadër të Kornizës për Investime në Ballkanin Perëndimor.
Nga këto investime përfituan Serbia, Shqipëria, Maqedonia e Veriut dhe Bosnje Hercegovina.
Korniza Investuese e Ballkanit Perëndimor është një iniciativë e përbashkët e BE-së, institucioneve financiare dhe donatorëve, që synon zhvillimin socio-ekonomik dhe perspektivën evropiane të vendeve të Ballkanit Perëndimor. Vlera e përgjithshme e kësaj kornize është 2.1 miliardë euro.
