Në Apelin e GJKKO, SPAK kërkon 12 vite burg për Ish-Ministrin e Brendshëm, Saimir Tahiri
Prokuroria e Posaçme Kundër Korrupsionit, SPAK, ka kërkuar sot nga Apeli i GJKKO dënimin me 12 vite burg përkatësisht 8 vite burg për shkak të gjykimit të shkurtuar, për Ish-Ministrin Saimir Tahiri dhe Ish-Drejtorin e Policisë së Vlorës, Jaeld Çela. Ndërkohë, Ish-Ministri i Brendshëm, Saimir Tahiri kërkoi pafajësi.
Saimir Tahiri, raporton BW, kishte shkuar i përgatitur në sallën e gjyqit ku kishte marrë me vete dhe një tabelë me detaje të përshkruara nga dosja e tij ndërsa i ka kërkuar trupës gjykuese që të veprojë mbi bazë të provave.
“Ju kërkoj me përulësi, veproni me profesionalizëm të gjitha provat. Nëse do të bëni këtë gjë, unë do të jem i pafajshëm,” tha Saimir Tahiri duke analizuar 4 episodet e tregtimit të narkotikëve në Itali, ndërsa shtoi se kishte kryer detyrën e tij.
Duke pasur parasysh faktin se çështja është voluminoze, trupa gjykuese u shpreh se vendimin përfundimtar do ta marrë më 4 shkurt në orën 13:00.
Fillimisht, Prokuroria e ka akuzuar Saimir Tahirin për trafik të narkotikëve dhe kërkoi arrestimin e tij, por shumica parlamentare socialiste e bllokoi kërkesën për arrestim dhe e sulmoi hetimin e prokurorisë si të njëanshëm.
Në shtator 2019, Saimir Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar.
