Në Muzeun e BSH, historiku i krijimit të Bankës Kombëtare dhe Dhimitër Pasko si bankier

Drejtoria e Përgjithshme e Arkivave, DPA, në bashkëpunim me Muzeun e Bankës së Shqipërisë, BSH, prezantuan sot dy ekspozita mbi rrugëtimin e krijimit dhe konsolidimit të institucionit qendror financiar shqiptar, dhe profili i ekonomistit dhe bankierit, Dhimitër Pasko.

Kështu, duke filluar prej sot deri më 20 Maj 2022, nga ora 09:00-18:00, publiku shqiptar mund të informohet dhe edukohet nga dy ekspozitat e përkohshme në Muzeun e BSH-së me dokumente historike të Arkivit Qendror Shtetëror, AQSH:

– “Përpjekjet e shtetit shqiptar për krijimin e bankës kombëtare shqiptare përgjatë viteve 1913-1925” dhe

– “Dr. Pas/Mitrush Kuteli, figura e tij si ekonomist dhe bankier”.

Narrativa e krijimit të Bankës Kombëtare Shqiptare në harkun e vjetëve 1913-1925, bazohet në një sërë dokumentesh, sikurse:

Korrespondenca me Ministrinë e Financave për krijimin e bankave private dhe shtetërore në vend; Projektligji organik mbi Bankën e Shqipërisë, hartuar nga Komisioni Ekonomik i Lidhjes së Kombeve; Projektligji mbi shtypjen e kartëmonedhës dhe krijimin e Bankës Kombëtare; Vendimi i Këshillit të Ministrave për marrëveshjen ndërmjet Shqipërisë dhe Italisë, mbi formimin e Bankës Kombëtare; Marrëveshja e grupit financiar italian me qeverinë shqiptare për krijimin e Bankës Kombëtare Shqiptare, mbi financimet e shoqërisë “SVEA” etj.

Ndërsa, ekspozita e dytë e ndërtuar në trajtën e profilit të ekonomistit dhe bankierit të njohur shqiptar, Dhimitër Pasko, paraqet ndër të tjera:

Emërimin e Paskos si konsulent teknik prej Komitetit Ekzekutiv të Bankës Kombëtare; një analizë ekonomike të Paskos mbi çmimet në Shqipëri dhe pasuritë natyrore të Kosovës të shfrytëzuara nga italianët; një studim të bankierit mbi shqiptarizimin e Bankës Kombëtare.

Të pranishëm në çeljen e ekspozitave ishin Drejtoresha e Komunikimit në DPA, Elsa Saka, specialistë të institucionit, si edhe Përgjegjësja e Zyrës së Muzeut në BSH, Shpresa Lubonja.

Ndryshe, ky aktivitet zhvillohet në kuadër të Ditës Ndërkombëtare të Muzeve.

Muzeu i BSH-së do të jetë i hapur për publikun e interesuar lidhur me ekspozitat deri ditën e premte, më datë 20 maj 2022. Hyrja është e lirë.