Në QKUK realizohet me sukses një operacion kompleks vaskular
Në Klinikën e Kirurgjisë Vaskulare pranë Qendrës Klinike Universitare e Kosovës, QKUK, është realizuar me sukses një ndërhyrje komplekse kirurgjikale për trajtimin e aneurizmës së arteries splenike tek një paciente 71-vjeçare.
Aneurizma me dimension rreth 7 centimetra dhe pjesërisht e trombozuar paraqiste rrezik të lartë për rupturë dhe gjakderdhje potencialisht fatale, thekson QKUK duke bërë të ditur detajet e ndërhyrjes.
“Pas diagnostikimit me angiografi CT, CTA, ekipi multidisiplinar vendosi për trajtim kirurgjikal të hapur. Gjatë ndërhyrjes është kryer aneurizmektomia dhe rekonstruksioni vaskular me anastomozë termino-terminale të arteries splenike, duke bërë të mundur ruajtjen e splenit dhe funksionit të tij imunologjik e hematologjik.”
Rasti është shoqëruar edhe me sfida të rëndësishme anesteziologjike dhe pulmonare, të cilat janë menaxhuar me sukses nga ekipi profesional i anesteziologjisë dhe kujdesit intensiv, thekson QKUK përmes njoftimit njoftim.
Në fund, Qendra Klinike Universitare e Kosovës vlerëson se ky sukses pasqyron profesionalizmin, përkushtimin dhe bashkëpunimin multidisiplinar të stafit në trajtimin e rasteve komplekse kirurgjikale dhe në ofrimin e kujdesit cilësor për pacientët.
