Në takim me Osmanin, Erdogan: Turqia do të vazhdojë duke e rritur mbështetjen për njohjen e Kosovës

Presidenti Recep Tayyip Erdogan në takim me homologen e tij nga Kosova, Vjosa Osmani, ka siguruar se Turqia do të vazhdojë duke e rritur mbështetjen e saj për njohjen e Kosovës.

Në takimin i cili u zhvillua në margjinat e aktivitetit “TRT World Forum 2023” që po mbahet në Stamboll, raporton Agjencia turke e lajmeve Anadolu, mes tjerash janë trajtuar marrëdhëniet Turqi-Kosovë, çështjet rajonale dhe globale si dhe zhvillimet e fundit në kuadër të sulmeve të Izraelit ndaj Palestinës.

Sipas Zyrës së Presidencën turke, Presidenti Erdogan ka theksuar nevojën që komuniteti ndërkombëtar të veprojë në unitet që Izraeli të japë llogari për krimet e tij të luftës ndërsa Turqia vazhdon përpjekjet për sigurimin e një armëpushimi të përhershëm në rajon dhe dërgimin e ndihmave humanitare në Gaza.

“Presidenti Erdogan theksoi se Turqia do të vazhdojë duke e rritur mbështetjen e saj për njohjen e Kosovës dhe rruga për paqe dhe stabilitet në rajonin ku gjendet Kosova, kalon përmes dialogut,” bën të ditur Zyra e Presidencës turke.