Në Tiranë, Baerbock: Tensionet mes Serbisë dhe Kosovës po rrezikojnë edhe Procesin e Berlinit

Ministrja e Punëve të Jashtme e Gjermanisë, Annalena Baerbock, tha sot në prag të takimit të Ministrave të Jashtëm në Tiranë se tensionet e ditëve të fundit mes Serbisë dhe Kosovës po rrezikojnë edhe Procesin e Berlinit.

“Duhet të ecim drejt BE-së më shpejt dhe për këtë arsye Procesi i Berlinit është vendimtar lidhur me ndërlidhjen në rajon, bashkëpunimin dhe marrëveshjet e tjera mbi lëvizshmërinë,” tha shefja e diplomacisë gjermane duke ritheksuar se në themel qëndron siguria.

“Prandaj, ne nënvizojmë se tensionet e ditëve të fundit mes Serbisë dhe Kosovës po rrezikojnë edhe Procesin e Berlinit. Unë i bëj një thirrje të fortë, së bashku me përfaqësuesit e Bashkimit Evropian, por dhe të SHBA-së, Serbisë e cila duhet të reduktojë forcat që kemi parë së fundmi,” tha Baerbock duke përfunduar:

“Por, edhe NATO nëpërmjet KFOR-it duhet të tregojë një angazhim më të madh në rajon.”

Qëndrimet e ministres së Jashtme të Gjermanisë, Annalena Baerbock, edhe në takimin kokë më kokë me ministrin e Jashtëm të Serbisë, Ivica Daçiç, para fotos familjare kanë bërë që Daçiç ta braktis këtë akt solemn.

Mësohet se ministri i Jashtëm i Serbisë, Ivica Daçiç, bojkotoi foton familjare pasi ka patur një debat me ministren e Jashtme të Gjermanisë lidhur me situatën në veri të Kosovës dhe sulmit terrorist të organizuar nga shteti serb.

Punimet e Samiti vazhduan me dyer të mbyllura dhe në orën 12:30 pritet një konferencë e përbashkët për shtyp.

Ndryshe, në kuadër Samitit të Procesit të Berlinit sot në Tiranë mbahet takimi i Ministrave të Punëve të Jashtme të Procesit të Berlinit. Në këtë Samit marrin pjesë: Komisioneri për Zgjerimin i KE, Oliver Varhelyi, përfaqësuesja e EAS, Angelina Eichhorst; ministrat e Jashtëm të Kosovës, Malit të Zi, Maqedonisë së Veriut, Serbisë dhe Bosnjë Hercegovinës si dhe të vendeve anëtare të Procesit të Berlinit si Gjermania, Austria, Greqia, Hungaria etj.