Nesër, ora verore. Akrepat shkojnë 60 minuta përpara

Nesër fillon llogaritja verore e kohës. Zyrtarisht ndërrimi i orës bëhet në orën 02:00, atëherë kur akrepat kalojnë 60 minuta para duke shënuar orën 03:00.

Këtë vit, e diel më 31 mars shënohet fillimi i llogaritjes verore të kohës.

Lidhur me ndryshimin e orës ka reaguar edhe Komuniteti Mysliman i Shqipërisë duke njoftuar besimtarët për orarin e agjërimit:

“Të dashur besimtarë, mesnatën e sotme bëhet ndryshimi i orës. Akrepat do të shkojnë 60’ para, si rrjedhojë edhe oraret e namazeve do të jenë sipas orës së re. Për më tepër, referojuni kalendarit zyrtar të Komunitetit Mysliman të Shqipërisë,” thekson Komunisteti Mysliman duke dëshiruar agjërim e lutje të pranuara!

Ndryshe, prej vitit 1981 u vendos ndryshimi i orës, që përfshin të gjithë Evropën, ku në shumë shtete të saj, akrepat e orës lëvizin 60 minuta përpara.

Norma evropiane përcakton në mënyre të qëndrueshme datat e fillimit të periudhës së orës verore, ku akrepat lëvizin 60 minuta para dhe orës dimërore kur ata lëvizin 1 orë pas.

Llogaritja dimërore do të rifillojë nga e diela e fundit e tetorit, 27 tetor.