New York, Kurti takim me Erdoğanin, diskutojnë edhe për aktgjykimin e Gjykatës Speciale
Kryeministri Albin Kurti është takuar në New York me Presidentin e Turqisë, Recep Tayyip Erdoğan, me të cilin, mes tjerash, ka diskutuar për aktgjykimin e Dhomave të Specializuara ndaj ish-krerëve të UÇK-së, të cilin e ka cilësuar të padrejtë juridikisht dhe moralisht, si dhe të pasaktë historikisht dhe faktikisht.
“Me Presidentin Erdoğan diskutova edhe për aktgjykimin e padrejtë juridikisht dhe moralisht dhe të pasaktë historikisht dhe faktikisht, të shpallur javën e kaluar nga Dhomat e Specializuara në Hagë ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, e që patjetër duhet të korrigjohet në Apel,” shprehet Albin Kurti pas takimit përmes rrjetit social Facebook ndërsa ka falënderuar Erdoğanin për mbështetjen e vazhdueshme të Turqisë ndaj Kosovës, përfshirë diplomacinë, fuqizimin ushtarak, bashkëpunimin në industrinë e mbrojtjes dhe përkrahjen për anëtarësim në NATO.
“Kosova me Turqinë kanë vazhduar forcimin dhe rritjen tregtare me ç’rast ato arrijnë në vlerën prej 1 miliard dollarësh me synimin që të rriten më shumë në të ardhmen,” tha Kryeministri Kurti duke theksuar rritjen e investimeve në Kosovë, si nisja e fabrikës së re të municionit në Gjakovë dhe Parkun e Energjisë së Erës në Rahovec, në bashkëpunim me kompani nga Turqia.
Duke shprehur mirënjohje për rolin shumëvjeçar të Turqisë në KFOR dhe kontributin e saj për sigurinë dhe stabilitetin në Kosovë, Albin Kurti ka bërë të ditur se së bashku me Kryetaren e Komunës Preshevë, Ardita Sinani, kanë ngritur edhe çështjen e diskriminimit të vazhdueshëm dhe sistematik të shtetit të Serbisë ndaj komunitetit shqiptar atje.
“Simetria e të drejtave të komuniteteve në vendet tona përkatëse është qasja dhe mënyra e domosdoshme për trajtim të drejtë dhe barabartë,” tha Kryeministri Albin Kurti duke bërë të ditur në fund se ka ftuar Presidentin Erdoğan për vizitë në Kosovë.
