Nga Kongresi, Kim: Mbështetja për Arsimin, si reforma në drejtësi dhe lufta kundër kourrpusionit

Ambasadorja e Shteteve të Bashkuara në Tiranë, Yuri Kim, e tha qartë sot nga Kongresi i Arsimit se mbështetja për politikën arsimore është aq e rëndësishme për SHBA, sa ç’është mbështetja amerikane për reformën në drejtësi dhe për luftën kundër korrupsionit.

“Shqipëria është në një pikë kritike. 31 vite më parë askush nuk e kishte paramenduar që sot Shqipëria të ishte anëtare e NATO-s dhe ju uleni me SHBA-të, Britaninë, Francën, Kinën në Këshillin e OKB-së duke diskutuar për çështjet më të rëndësishme në botë dhe një muaj më parë hapët zyrtarisht negociatat për anëtarësim në BE për të marrë vendin tuaj të drejtë. Arsimimi do të jetë kyç se sa shpejt do të lëvizni dhe sa shumë përparim do të bëni. Mbështetja jonë është e rëndësishme për ne gjithashtu sepse politika jonë që ne duam t’ju shohim plotësisht te integruar në BE,” tha Yuri Kim duke folur për rëndësinë që ka Arsimi për Shtetet e Bashkuara ndërsa përfundoi:

“Mbështetja për politikën tuaj arsimore është aq e rëndësishme për ne, sa ç’është mbështetja jonë për reformën në drejtësi edhe për luftën kundër korrupsionit. Në 31 vitet e fundit shqiptarët dhe amerikanët kanë marrë pjesë në disa programe shkëmbimi përmes Fulbright. Shqipëria ka një të ardhme të jashtëzakonshme dhe studentët kanë një potencial të shkëlqyer.”

Ndërsa Kryeministri Edi Rama edhe me këtë rast përdori simbolika me mesazhe të fuqishme nga historia: “Gjuha shqipe është e rrezikuar për shkak të presionit të madh të konsumit të fjalëve për të komunikuar në një moment kur distanca është zëruar dhe mundësia për komunikim bëhet gjithmonë e më marramendëse.”

“Me këtë fjali e nisi fjalimin e tij Dervish Hima në hapje të Kongresit të dytë të Manastirit dhe kur ka kaluar një shekull nga Kongresi i Manastirit një gur themeli që u fokusua te gjuha dhe më pas te arsimi, ne mblidhemi këtu në një Kongres që natyrisht është shumë modest për nga pesha se sa kongresi i manastirit por që në thelbin e vet ka të njëjtin shqetësim, përparimin e kombit shqiptar. Mësimi i shqipes dhe arsimimi i popullit shqiptar ishte për delegatët e kongresit të Manastirit mjeti më i fuqishëm për të fituar pavarësinë, ndërsa sot mbrojtja e gjuhës shqipe dhe arsimimi me standardet më të mira bashkëkohore është mjeti më i fuqishëm për të siguruar vazhdimësinë në rrugën e prosperitetit. Shumë kush mund të pyesë, por nga se do ta mbrojmë ne gjuhën shqipe, ndërkohë që përgjigjja është e thjeshtë, mjafton të harxhojë secili për të lundruar në gjithë kanalet e informacionet që të shikojë se çfarë ndodh me gjuhën shqipe, çfarë ndodh me shenjat e pikësimit, me pikat mbi ë, me formulimin e strukturës së fjalive dhe me ortografinë në tërësi.

Teksa brezi më i ri përfshihet me shpejtësi në rrugën e komunikimit përmes tel celularë, përmes kompjuterëve, gjuha është më e rrezikuar dhe nga ana tjetër kjo nuk i ndodh vetëm gjuhës sonë, por të gjitha gjuhëve që janë në këtë presion të madh të konsumit të fjalëve për të komunikuar në një moment kur distanca është zëruar dhe mundësia për komunikim bëhet gjithmonë e më marramendëse. Besoj se na takon të gjejmë mënyra dhe të kërkojmë përmes një dialogu të gjerë mes nesh, rrugë për ta forcuar pozicionin e gjuhës shqipe në këtë kaos gjuhësor dhe komunikativ ku është përfshirë gjithë bota dhe ne jemi thellësisht të përfshirë,” tha Edi Rama duke shtuar se na takon të shohim me shqetësim se domosdoshmëria për të rritur standardet e arsimimit dhe për t’i njehsuar këto standarde me kornizën e standardeve më të mira bashkëkohore është një urgjencë e madhe, pasi po njësoj dhe gjithë procesi i mësimdhënies dhe mësimmarrjes është nën presionin në rritjen e vazhdueshme të transformimeve teknologjike.

“Libri bëhet përherë e më i huaj dhe rrugët e komunikimit bëhen kaotike dhe të pakontrollueshmne.
Ajo që është pak por është shumë e sigurt është se sot ne kemi nevojë më shumë se asnjëherë më parë për të bashkuar mendjet tona përtej kufijve të Shqipërisë, në të gjithë hapësirat ku jetohet dhe flitet shqip.”

Ky bashkim mendjesh, tha në fund Kryeministri Edi Rama, është shumë e rëndësishme që të na japë më shumë të kuptojmë dhe të gjejmë se si dhe çfarë duhet të vendosim për të nesërmen ndërsa vlerësoi se enciklopedia shqiptare, fjalori i madh i gjuhës dhe libri themelor i historisë së shqiptarëve janë projekte që kanë hyrë në rrugën e jetësimit të tyre.

“Është për të ardhur keq që për shumë e shumë vite ne nuk e patëm këtë mundësi, por nga ana tjetër lajmi i mirë është se sot është shtruar rruga për t’i pasur këta libra shumë themelorë për kombin tonë, botën tonë akademike dhe për brezat e tjerë. Libra të hapur që çdo gjeneratë i pasuron dhe i përmirëson, por që sot janë mungesa e boshllëqe të mëdha në këtë rrugë, ku përpjekja për gjuhën duhet të jetë e gjithanshme.”