Nick Ducich: Korrupsioni dhe kriminaliteti, problemet më të mëdha në Kosovë

Komandanti i bazës  amerikane Bondsteel, koloneli amerikan me origjinë serbe Nick Ducich ka vlerësuar se situata në Kosovë është e qetë dhe stabël duke shtuar se ushtarët e KFOR-it po bëjnë gjithçka që të garantohet një mjedis për lëvizje të lirë për të gjithë banorët e Kosovës, raporton Koha.net.

“Situata e sigurisë në zonën time është e qetë dhe stabël. Sipas mendimit tim, problemi më i madh me të cilin ballafaqohet Kosova e për të cilin ka treguar kohë më parë edhe raporti i Komisionit Europian janë korrupsioni dhe kriminaliteti.

I pyetur për problemet e serbëve në Kosovë që thekson gazeta “Veçernje Novosti” e Beogradit dhe se a ka kontakte me njerëzit e thjeshtë në terren, Ducich thotë se në veçanti me serbët ka kontakte pas shërbimeve kishtare. Ata, thotë ai, pa marrë para sysh moshën, paraqesin problemet që kanë.

Përshtypjet që ka për Kosovën janë të dyfishta: “E para është rëndësia historike dhe fetare e Kosovës, e pastaj dëshira që të zgjidhen çështjet urgjente në mënyrë që të krijohen mundësi edukative e ekonomike”, tha Ducich .

Kohë më parë ai ka qenë në Patrikanën e Pejës, e cila, siç thotë e ka mahnitur dhe i ka lënë mbresë të jashtëzakonshme për tërë jetën.

Takohet me politikanë serbë, prefektë, njerëz të rëndomtë por edhe me kolegë në Ushtrinë e Serbisë, theksoi ai, dhe gëzohet që shumë shpejt do ta vizitojë Serbinë dhe sërish do të takohet me përfaqësues të Ushtrisë së Serbisë.